“Звезда” телеканалында – легендар комдивты данлаған фильм

“Звезда” телеканалында 112-се Башҡорт кавалерия дивизияһы командиры, генерал-майор Миңлеғәле Шайморатов тураһында документаль фильмдың премьераһы былтыр уҡ күрһәтелгәйне. Уны әле лә ҡарарға мөмкин. “ДокТВ” студияһының “Армия легендалары” фильмдары серияһын Александр Маршал алып бара.

Фильм авторҙары легендар шәхес һәм уның үлеме менән бәйле һорауҙарға яуаптар эҙләй. Хәрби тарихсылар, музей хеҙмәткәрҙәре, журналистар генерал-майор тураһында һөйләй.

Ижади төркөм фильмды төшөрөү өсөн архивтар менән берлектә ҙур эш алып барған. Кинотаҫмала Өфө һәм Ҡырмыҫҡалы төбәктәре күрһәтелә, Милли музейҙа, 112-се Башҡорт кавалерия дивизияһы музейында һаҡланған фото һәм видеоматериалдар файҙаланылған. Таҫма Заһир Исмәғилевтең Ҡадир Даян шиғырына яҙылған “Шайморатов генерал” йыры менән тамамлана.

Ленин, Хеҙмәт Ҡыҙыл Байраҡ, Суворов һәм Кутузов орденлы 112-се (16-сы гвардия) Башҡорт кавалерия дивизияһы 1941 йылдың декабрендә Өфөлә төҙөлгән. Дивизия Тыуған илгә 78 Советтар Союзы Геройын биргән. Был Совет илендә ойошторолған башҡа бер генә дивизияның да тарихында булмаған хәл.

“Звезда” телеканалында “Армия легендалары” проекты 2016 йылдан бирле дауам итә. Генерал Шайморатов тура­һындағы фильмды “Звезда” каналы сайтында ҡарарға мөмкин: https://tvzvez­da.ru/schedule/programs/content/201509181301-qpj0.htm/201804041136-wlq2.htm