"Дәүләт старты" республика форумында ҡатнашыусылар менән осрашыу

Радий Хәбиров «Патриот» паркында "Дәүләт старты" республика форумында ҡатнашыусылар менән осрашты

31 октябрҙә Шишмә районында төбәк Башлығы Радий Хәбиров "Дәүләт старты. Башҡортостан” республика форумыында ҡатнашыусылар менән осрашты. Рәсәй Геройы Максим Серафимов исемендәге «Патриот» хәрби-патриотик паркында үткән форум йәш дәүләт һәм муниципаль хеҙмәткәрҙәрҙең һөнәри компетенцияларын үҫтереүгә йүнәлтелде һәм үҙ майҙансығында 35 йәшкә тиклемге 200-ҙән ашыу белгесте йыйҙы. Радий Хәбиров сығышында төбәкте һөҙөмтәле үҫтереү һәм кешеләрҙең йәшәү сифатын яҡшыртыу өсөн дәүләт хеҙмәткәрҙәрен профессиональ әҙерләүҙең мөһимлеген һыҙыҡ өҫтөнә алды.

- Мөһим эште һайлауығыҙ хөрмәткә лайыҡ. Күптәрегеҙ ваҡыт үтеү менән Башҡортостандың идара итеү командаһы составында буласаҡ. Шуға күрә беҙ һеҙгә эшегеҙҙә һәм уртаҡ бурыстарыбыҙҙы хәл итеүҙә ярҙам итер өсөн ошондай осрашыуҙар үткәрергә ҡарар иттек. Ил һәм республика үҫешенең ҡатмарлы осоронда дәүләт хеҙмәткәрҙәре үҙ бурыстарын һөҙөмтәле үтәргә һәм Башҡортостан иҡтисадының һәм социаль өлкәһенең тотороҡло эшен тәьмин итергә тейеш, - тип билдәләне төбәк Башлығы.                                                                                                                                 

 - Идара итеү командаһының һәм урындағы етәкселәрҙең өҫтөнлөклө йүнәлеше - ул махсус хәрби операцияға ярҙам итеү. Бынан тыш, төбәктең яҡшы үҫеш темптарын һаҡлау мөһим. Яҡташтарыбыҙ бөгөн Ватанды һаҡлай. Беҙ барыбыҙ ҙа фронттағы яугирҙәргә ярҙам итеү, мөһим республика проекттарын һәм программаларын тормошҡа ашырыу өсөн үҙ урындарыбыҙҙа шулай уҡ яуаплы эшләргә тейешбеҙ, – тип аңлатты Радий Хәбиров. - Төп социаль-иҡтисади күрһәткестәр буйынса Башҡортостан ыңғай динамика күрһәтә. Беҙ халыҡ алдындағы бурыстарыбыҙҙы үтәйбеҙ, иҡтисадтың төрлө тармаҡтарында ҙур объекттар төҙөйбөҙ, социаль өлкәне үҫтерәбеҙ. Бергәләп эшләп, заман талаптарына яуап бирербеҙ һәм көслөрәк булырбыҙ, тип ышанам, -тине Радий Хәбиров.

Осрашыу барышында Башҡортостан Башлығы йәш дәүләт хәҙмәткәрҙәре менән аралашты. Ҡатнашыусылар төбәк етәксеһенә форумды ойошторған һәм коллегалары менән тәжрибә уртаҡлашыу мөмкинлеге өсөн рәхмәт белдерҙе, шулай уҡ ҡыҙыҡлы һорауҙар бирҙе. Темаларҙың береһе - дәүләт органдарының йәш белгестәренә ярҙам итеү механизмдарын үҫтереү. Радий Хәбиров билдәләүенсә, төбәк башлығы Хакимиәте конкурс нигеҙендә дәртләндереү сараларын әҙерләү мөмкинлеген ҡараясаҡ. Дәүләт хеҙмәткәрҙәре шулай уҡ республика һәм муниципаль власть органдарына остазлыҡ институтын ойошторорға тәҡдим итте.

- Был яҡшы идея. Беҙҙә Башҡортостан Башлығы Хакимиәтендә, республика Хөкүмәтендә тәжрибәһе аҙ булған коллегаларға остаз була алырлыҡ бик күп белгестәр эшләй. Бөгөн беҙҙең дәүләт хеҙмәткәрҙәре төрлө федераль квалификация күтәреү программаларында һәм стажировкаларҙа ҡатнаша. Мин үҙем Оскар Ситдиҡовтың «Геройҙар ваҡыты» президент программаһында остазмын, – тине Радий Хәбиров. - Төбәк кимәлендә бындай системаны яйға һалырға тейешбеҙ. Мәҫәлән, район йәштәре, Өфөгә килеп, ҡала хакимиәтендә эшләй йәки алдынғы райондарҙан коллегалары тәжрибәһе менән башҡа муниципалитеттар менән уртаҡлаша алһын өсөн. Осрашыу йомғаҡтары буйынса был эште ойошторабыҙ, тейешле йөкләмәләр бирәм. Балалар һәм үҫмерҙәр араһында дәүләт һәм муниципаль хеҙмәтте популярлаштырыу темаһына комментарий биреп, Башҡортостан Башлығы республикала был һөнәрҙең абруйын күтәреү буйынса эш алып барылыуын билдәләне.

– Беҙгә бергәләп заманса чиновник образын булдырырға кәрәк – был залда ултырыусылар кеүек, – тине Радий Хәбиров. - Мәктәптәрҙә класс сәғәттәре аша быны эшләү - иң яҡшы ысул түгел. Эшегеҙ менән кешеләрҙең тормошон яҡшыртырға һәм хеҙмәттәштәрегеҙгә ошондай ыңғай өлгө күрһәтергә кәрәк. Был исемде компетентһыҙ тәртибе менән дискредитациялаған кешеләрҙе чиновниктар араһынан сығарыу ҙа мөһим. Осрашыуҙа тикшерелгән мәсьәләләр иҫәбендә – дәүләт һәм муниципаль хеҙмәткәрҙәрҙең миссияһы булды. Йәш чиновниктар уны «Һәр граждан мәнфәғәтендә йәмғиәткә хеҙмәт итеү» девизы менән билдәләй. Был раҫлау нигеҙендә берҙәмлек, яуаплылыҡ, намыҫлылыҡ, үҫешкә ынтылыш, кешеләргә хөрмәт ята. - Һеҙ атаған бөтә нәмә лә бик шәп. Дәүләт хеҙмәткәрҙәре өсөн халҡыбыҙ мәнфәғәте өсөн эшләү бик мөһим. Шул уҡ ваҡытта дәүләт хеҙмәте – ҙур, етди һәм әһәмиәтле мәсьәләләрҙе хәл итеү. Был - миссия. Һөнәреңә шул күҙлектән ҡараһаң, шул саҡта рәхәтлек табырһың, – тип билдәләне Радий Хәбиров.

Йәш белгестәр төбәк етәксеһе дәүләт һәм муниципаль хеҙмәткәрҙәргә кәңәш бирә алырлыҡ китаптар хаҡында ла һораны. "Мастер һәм Маргарита"ны, минеңсә, барыһы ла уҡырға тейеш. Был ғәжәйеп роман миңә бик етди тәьҫир итте, - тип билдәләне Радий Хәбиров. - Күп уҡырға кәрәк. Мин үҙем беренсе донъя һуғышын өйрәнергә яратам. Был тарих - илебеҙҙең ҡатмарлы конкурент донъяһында иҫән ҡалыуы тураһында. Ул бөгөнгө ваҡиғаларҙы ла аңларға ярҙам итә".

Төбәк Башлығы республиканың ауыл биләмәләрендә спорт объекттары төҙөү тураһында һорауға яуап бирҙе.                                                                                     - Элек планлаштырылғанса, бөтә муниципалитеттарҙа ла бассейндар төҙөмәнек әле. Хатта 40 меңдән ашыу кеше йәшәгән Благовещенда ла физкультура-һауыҡтырыу комплексы булманы. Мәсәғүттә боҙ һарайы һәм бассейн төҙөргә ниәтләйбеҙ. Баймаҡ районының Темәс ауылында  бассейнлы физкультура-һауыҡтырыу комплексы  барлыҡҡа киләсәк. Баймаҡта Боҙ һарайын төҙөп бөтөрбөҙ. Һәр районда ФОКтар һәм бассейндар булырға тейеш, - тине Радий Хәбиров.

Республика етәксеһе шулай уҡ Рәсәй Президенты Владимир Путин менән осрашыуҙа Өфөлә ҙур еңел атлетика манежын һәм федераль финанслау менән бокс прогресы үҙәген төҙөү пландарын тикшереүҙәре хаҡында һөйләне. 

 - Президентҡа беҙҙең Көрәш һарайы оҡшаны. 10 ноябргә унда күнекмәләр башлана. Иң мөһиме, яңы майҙансыҡтағы спорт секцияларына 1 300-ҙән ашыу бала яҙылды. Беҙ унда уларҙың күнекмәләре өсөн бөтә шарттар булдырҙыҡ. Дөйөм алғанда, беҙҙең ҙур объекттар – Көрәш һарайы, Фехтование һәм ишкәкле слалом үҙәктәре республикаға һәм балаларҙы спортҡа йәлеп итеү өсөн эшләйәсәк, – тине Радий Хәбиров.                           

Осрашыу аҙағында төбәк етәксеһе форумда ҡатнашыусыларға рәхмәт әйтте һәм бөтә был йөкләмәләрҙе артабан тормошҡа ашырыу өсөн йомғаҡлау протоколында рәсмиләштереүҙәрен һыҙыҡ өҫтөнә алды.