Бында киләсәк тәрбиәләнә

Баймаҡ районының Темәс дөйөм белем биреү мәктәбенең башланғыс клас­тар уҡытыусыһы Рәғиҙә Асаинова балаларға белем биреүҙә яңыса алымдар ҡуллана.

Уҡытыусы әйтеүенсә, хәҙерге көн­дә уҡыусыларҙа традицион алымдар менән генә дәрескә ҡы­ҙыҡ­һыныу уятыуы ҡыйын. Шун­лыҡтан был йүнәлештә ул ныҡ эҙ­лә­нә, төрлө методикаға мөрәжәғәт итә.

— Сингапур методикаһының нигеҙе — уҡыусыларҙы тормошта йәшәү серенә төшөндөрөү. Уҡыу­сы­лар йәмғиәтте үҫтереүгә үҙ өлө­шөн индерһен өсөн, уларҙы командала эшләү, хеҙмәттәшлек итеү, уйлай белеү, үҙ фекерен әй­тә алыу, креатив уйлау серҙә­ренә төшөн­дө­рөргә кәрәк. Ғәҙәттә, беҙҙең дә­рестә бер-ике уҡыусы яуап бирә, ә ҡалғандары тик ултыра. Сингапур методикаһы бу­йын­са уҡыусылар дүртәрләп төр­көмгә бүленеп ултыра, йәғни балалар команда ме­нән эшләй, һо­рау­ға яуап биргәндә барыһы ла үҙ фекерен әйтә, көс­лөрәк уҡыу­сылар ярҙам итә. Был дәрестә бер кем дә ситтә ҡалмай. Шулай уҡ был алым бер-береңә ихтирам менән ҡарау сифаттарын да тәрбиәләй. Сингапур мето­дикаһы балаларға оҡшай: уларҙың дә­рескә ҡыҙыҡһыныуы, белем­дәре артты, — ти Рәғиҙә Риф ҡыҙы.

Балаларға ҡыҙыҡлы дәрестәр биреү, ата-әсәләр менән ныҡлы бәйләнеш булдырыу, мәктәп тормошонда үткәрелгән сараларҙа тотош класс менән әүҙем ҡатна­шыуҙан тыш, Рәғиҙә Асаинова 2007 йылдан алып директорҙың баш­ланғыс кластар буйынса урынба­ҫары вазифаһын башҡара.

Сығышы менән таланттарға бай Сыңғыҙ ауылында донъяға килгән ҡыҙ бәләкәйҙән уҡытыусы булырға хыяллана. Ата-әсәһе лә – ғүмере буйы балаларға белем биргән хөрмәтле мәғариф ветерандары. Ә олатаһы Хөрмәт Байегетов — Таулыҡай ауылындағы иң абруйлы уҡытыусыларҙың береһе. Шуға күрәлер ҙә Рәғиҙә Асаинова, уҡы­тыусылар динас­тияһына тоғро ҡалып, туғыҙынсы класты тамам­лағас, документтарын Сибай педагогия учили­щеһына тапшырған­дыр. Тап ошонда буласаҡ тормош иптәшен осрата һәм, диплом алғас та, Йылайыр егете Мансур Асаинов менән ғаилә ҡора.

Йәштәр тәүҙә хеҙмәт юлын Йылайыр районының Надеждинск мәк­тәбендә башлай. Ситтән тороп Магнитогорск дәүләт педагогия уни­верситетын тамам­лайҙар һәм 2004 йылдан Темәс урта мәктә­бендә балаларға белем бирәләр.

— Һөíәðемде бик яратам, көн дә дәрескә ашҡынып киләм, — тип һүҙен дауам итә әңгәмәсем. – Һәр бала үҙенсәлекле талантҡа эйә. Ошо һәләттәрен асыуға һәм үҫтереүгә ҙур иғтибар бүләм. Һөҙөмтәлә уҡыусыларым район, республика конкурстарында әү­ҙем ҡатнаша. Интернет аша ойош­торолған төрлө бәйгеләрҙә һәр саҡ сығыш яһайбыҙ. Шулай уҡ улар спортта ла, йыр-бейеүҙә лә алдынғылыҡты бирмәй. Улар­ҙың күңелендә үҙ-үҙенә ышаныс, ихтыяр көсө тәрбиәләү айырыуса мөһим тигән фекерҙәмен.

Талапсан һәм үҙ эшен яратҡан уҡытыусы Рәғиҙә Асаинова тормош иптәше Мансур Сөләймән улы ме­нән өс балаға ғүмер биргән. Оло улдары Илсур Өфө авиация инсти­тутының магис­тратураһында уҡый, Зөлфиә — туғыҙынсы класта, ә бәләкәс Ғәзизгә әле дүрт кенә йәш.

Баймаҡ районы