Ҡылҡәләмгә тотоноғоҙ, әсәләр!

“Башҡортостан” телерадиокомпанияһы Башҡортостандың Ғаилә, хеҙмәт һәм халыҡты социаль яҡлау министрлығы менән берлектә әсәлек менән бергә һүрәт төшөрөү һәләте асылған гүзәл заттарҙың үҙенсәлекле күргәҙмәһен ойоштора.

Сарала республикала йәшәгән, бала бағыу бәхетен татыған, һүрәт төшөрөү, һынлы сәнғәт менән мауыҡҡан һәр ҡатын-ҡыҙ ҡатнаша ала. Үҙенсәлекле башланғыстың авторы – Башҡортостан Башлығы вазифаһын ваҡытлыса башҡарыусы Радий Хәбировтың ҡатыны Каринэ Хәбирова. Ул үҙе лә, әсә булғас, һынлы сәнғәт менән мауыға башлаған, фекерҙәштәрен тапҡан.

– Бихисап әсәйҙәр бәпес көткән мәлдә, йә ул тыуғандан һуң ҡылҡәләмгә тотона. Ә Башҡортостан, ғөмүмән, талантлы кешеләргә бай! Үҙем булған һәр районда профессиональ рәссамдар йәки һәүәҫкәрҙәр бар. Шуға ла ошондай һәләтле ҡатын-ҡыҙҙарға иғтибар бүлеү, уларға ярҙам итеү теләге тыуҙы, – ти Каринэ Владимировна.

Әгәр ҙә күргәҙмәлә ҡатнашырға теләһәгеҙ, акварель, гуашь, пастель, балауыҙ аҡбуры, ҡәләмдәр менән һүрәт төшөрөргә һәм эштәрегеҙҙең фотоһын, ошо һылтанма (Положение) буйынса тултырылған анкетаны [email protected] электрон адресына ебәрергә кәрәк. Һүрәттең ҙурлығы һәм тематикаһы сикләнмәй. Эштәрҙе шулай уҡ йәшәгән урынығыҙҙағы “Ғаилә” үҙәгенә алып барып тапшырырға мөмкин. Ғаризалар 25 апрелгә тиклем ҡабул ителә.

Һорауҙар булһа, 8 800-347-5000 телефоны буйынса шылтыратып, тулы мәғлүмәт алырға мөмкин. Шулай уҡ Башҡортостандың Ғаилә порталында ла яуаптар бар.

15 – 17 майҙа “Торатау” конгресс-холында “Вектор Бала саҡ-2019” Бөтә Рәсәй конгресы сиктәрендә әсә-рәссамдарҙың һүрәттәренән күргәҙмә ойоштороласаҡ.