Хеҙмәтенән йәм табып...

“Әгәр хужа яҡшы булһа, хеҙмәт тә була еңел”, тип халыҡ юҡҡа ғына әйтмәгән. Ысынлап та, һәр кемде ярты һүҙҙән аңлап, күҙ ҡарашынан һорауҙарына яуап биргән, борсолоу-мәшәҡәттәрҙе еңел генә еңеп сығырға ярҙам иткән етәксе менән эшләү, минеңсә, ҙур бәхет ул. Октябрьский коммуналь-төҙөлөш колледжы директоры Рифмир Рәхмәтулла улы Мәрҙәмшинды тап ана шундайҙарға тиңләргә була.

Уны уҡыу йорто хеҙмәткәрҙәре маҡсатына ирешеүсән, уңған, фиҙа­кәр, үҙ-үҙенә генә түгел, башҡаларға ла талапсан булғаны өсөн ихтирам итә. Бында эшләгән оло быуын вәкилдәре лә, әле генә хеҙмәт юлы башлаған йәш бел­гестәр ҙә, колледж уҡыусы­ла­ры ла уның кәңәшенә, йылы һү­ҙенә мохтаж, абруйлы етәксе­нән өлгө алып, улар уҡыу йорто данын йыраҡтарға таратып, яңы уңыш-ҡаҙаныштарға өлгәшә.

— Беҙҙең уҡыу йортонда белем һәм тәрбиә алып, оло тормош юлына аяҡ баҫҡан уҡыусы­лар ки­лә­сәктә ниндәй генә өлкәлә йә тар­маҡта эшләмәһен, уларҙың тор­мошта үҙ урындарын табып, йәм­ғиәттә файҙалы шәхес булып үҫәсәгенә бер тамсы ла шик юҡ, — ти колледж директоры Рифмир Рәхмәтулла улы. — Кисәге уҡыу­сылар менән аралар өҙөлмәй, бө­гөн дә тығыҙ бәйләнештәбеҙ, хат­та кәңәш һорап мөрәжәғәт итеү­селәр ҙә байтаҡ. Тимәк, улар һаман беҙгә таяна, беҙҙең яҡлауға мохтаж.

Рифмир Рәхмәтулла улы сы­ғышы менән Йәрмәкәй районы­ның Рәтамаҡ ауылынан. Бала сағынан уҡ теремек, ҡыҙыҡһы­ныу­сан үҫмер мәктәптә тырышып уҡый, төрлө байрам сараларында, спорт ярыштарында әүҙем ҡат­наша, үҙен һәр яҡлап әүҙем, һә­ләт­ле итеп таныта. Ә өлкән клас­тарҙа иһә егеттең ойоштороу һә­ләте ныҡлап асыла, йәмәғәт эштәрендә гел алдынғылар рә­тендә була. Урта мәктәптән һуң ул документтарын Башҡорт дәү­ләт университетының тарих факультетына тапшыра һәм уны уңышлы тамамлай.

— Тарих менән ныҡлап мәк­тәптә уҡыған саҡта уҡ ҡыҙыҡһына инем. Дәрестәргә ҙур ихласлыҡ менән йөрөнөм, шуға ла өлгөр­гәнлек аттес­таты алғас, кем бу­лырға, ҡайҙа уҡырға барырға тигән һорау борсоманы мине, — ти Рифмир Рәхмәтулла улы.

Йәш белгес хеҙмәт юлын 1975 йылда Әбйәлил районының Асҡар ауылы мәктәбендә тарих уҡытыу­сыһы була­раҡ башлай. Йәш кенә булыуына ҡа­рамаҫтан, Рифмир Рәхмәтулла улы үҙен ысын уҡы­тыусы, оҫта ойоштороу­сы итеп та­ныта. Бер нисә йылдан һуң алдынғы ҡарашлы, белемле егетте ВЛКСМ-дың Әбйә­лил районы комитеты секретары итеп тәғәйен­ләйҙәр. Район йәштәре араһында ғы­на түгел, ә район халҡы ара­һын­да ла тиҙ арала абруй ҡа­ҙа­нып, йәштәрҙең ышаныслы дуҫы, таянысы булып, улар менән төрлө тәрбиәүи эштәр башҡарып өлгөрә. Һуңынан ул ВЛКСМ-дың Баш­ҡорт­остан өлкә комитеты инструкторы, СССР-ҙың Ҡораллы Көс­тәре ротаһы командиры урынба­ҫары, ВЛКСМ-дың Әбйәлил рай­комының 1-се секретары вазифаларында була. 1983 йылдан БАССР-ҙың Дәүләт именлеге комитеты (КГБ) Сибай ҡалаһы бү­легенең оператив вә­киле вази­фаһын башҡара. Хеҙ­мәт бурыс­тары буйынса СССР Дәүләт именлеге комитетының Тбилиси ҡала­һындағы Юғары кур­сында уҡыта. 1991 йылдан Рә­сәй­ҙең федераль именлек хеҙмә­те (ФСБ) идара­лығында өл­кән оперуполномоченный, инс­пектор, 1998–2002 йылдарҙа Октябрьский ҡалаһы буйынса бүлек начальнигы була. Һуңынан “Электронеф­тегаз” йәмғиә­тенең генераль ди­рек­торының хәүеф­һеҙлек буйынса урынбаҫары, Өфө дәү­ләт нефть техник универси­те­тының Октябрьский филиалы доценты, Өфө дәүләт иҡтисад һәм сервис акаде­мияһы филиалының ижти­ма­ғи фәндәр кафедраһы мө­дире. 2011 йылдан һәм бөгөнгәсә Рифмир Рәхмәтулла улы Октябрьский коммуналь-төҙөлөш колледжы директоры вазифаһын башҡара.

Педагогтар, уҡыусылар төплө белемле, кешелекле етәксегә ҙур ихтирам менән, шул уҡ ваҡытта яҡын күреп, үҙ итеп ҡарай. Рифмир Рәхмәтулла улы һәр студенттың тормошо, көн­кү­ре­ше менән ҡыҙыҡһына, ятаҡта йыш була, уҡыусыларҙың хәлен белешеп тора. Ошо рәүешле абруйлы етәксе һәр кемдең күңел донъяһына кешелекле директор булараҡ үтеп инә. Ул, ғөмүмән, кеше­ләрҙең яҡшы һәм ыңғай яҡтарын ғына күрә белеүсе заттарҙан.

Тарих фәндәре кандидаты Риф­мир Мәрҙәмшин – күп һанлы ғил­ми хеҙмәт­тәр, китап һәм мәҡә­ләләр авторы ла. Уҡытыусы­лар­ҙың, сту­денттарҙың ижади баш­ланғыс­тарына һәр ваҡыт те­ләк­тәш­лек күрһәтә, үҙе лә төрлө са­ра­ларҙа әүҙем ҡатнашып, сәләмәт тормош алып бара һәм йәштәрҙе лә шуға өндәй.

Рифмир Рәхмәтулла улы бер көн менән генә йәшәмәй, ул килә­сәккә уй-хыялдар ҡороп, ең һыҙ­ғанып эшләй. Колледж тормошо йәмле, йәнле булһын өсөн бар тырышлығын һала. Уның етәксе­легендә уҡыу йортоноң матди-техник базаһы шаҡтай нығына, аш­ханаға, уҡыу йортона бына тигән ремонт үткәрелә. Уҡыу-уҡытыу программалары ла яңыртыла, бөгөн уҡыусылар яңы һөнәрҙәр үҙләш­терә.

2014 йылда колледжға 4-се һөнәр­се­лек училищеһы ҡушыл­ғандан һуң, эштәр тағы ла арта һәм күбәйә. Берҙәм, татыу коллектив был ауыр­лыҡтарҙы ла бергә кисереп, әле уҡыу йорто юғары һөҙөмтәләре менән күп­тәргә өлгө булып тора. Бында белем алыусы студенттар район, республика, Рәсәй кимәлендә үткәрелгән олимпиа­даларҙа, ярыш-бәйгеләрҙә ҡатнашып, йыш ҡына призлы урындар яулап, кол­ледждың данын сит тарафтарға тарата. Бынан тыш, төрлө проект­тарҙа ла көстәрен һынап ҡарарға өлгөрә тырыш уҡыусылар.

Рифмир Рәхмәтулла улының фи­ҙа­кәр хеҙмәтен дәүләтебеҙ ҙә юғары ба­һалаған. Ул “СССР-ҙың Ҡораллы Көстәренә — 70 йыл”, “Фи­ҙакәр хеҙмәте өсөн” миҙал­да­ры, ВЛКСМ-дың Баш­ҡорт­остан өлкә комите­тының һәм Башҡорт­остан Мәғариф министрлы­ғының Маҡтау грамоталары, “Рәсәйҙең урта һөнәри белем биреү лидеры” Маҡтау билдәһе менән бүләк­ләнгән.

Ғаиләһенән дә уңған Рифмир Рәхмәтулла улы. Әбйәлил райо­ны ҡыҙы Рима Рәүеф ҡыҙы менән улар ике балаға ғүмер бүләк ит­кән. Улдары Рөстәм, ҡыҙҙары Ра­зия, юғары уҡыу йорттарын та­мамлап, үҙаллы донъя көтә, ма­тур итеп эшләп йөрөйҙәр. Бө­гөн Рифмир Рәхмәтула улы һәм Рима Рәүеф ҡыҙы — өс ейәнгә хәстәр­лекле олатай-өләсәй.

— Шөкөр, яҙмышымдан йәм та­бып, күңел тыныслығы тойоп йә­шәйем, хеҙмәтемдән ҡыуаныс кисерәм, — ти Рифмир Рәхмәтулла улы.

Октябрьский ҡалаһы