Уңайлы ла, ҡулайлы ла

Әлбиттә, яңылыҡ Дәүләкән райо­нына ла ҡағылмай ҡалмаған. Былтыр 1 сентябрҙән Дәүләкән ҡала­һын­дағы 1-се, 3-сө, 4-се, 7-се мәк­тәптәр һәм райондың Соколовка ауылындағы башланғыс белем биреү мәктәбе уҡыусылары аҙна­һына биш көн белем алған. Ә быйыл 1 апрелдән Дәүләкән районындағы барлыҡ мәктәптәрҙең башланғыс кластар уҡыусылары һәм ете мәк­тәптең V-VI кластары уҡыусылары ошо уҡ система буйынса уҡый башлаған. Был – ҡала һәм район­дағы бар уҡыусыларҙың 61,5 проценты (4 мең 675 бала). Һөҙөмтәлә уҡыу пландарына ла үҙгәрештәр индерелгән.

Дәүләкән ҡалаһындағы 3-сө баш­ҡорт гимназия-интернаты дирек­торының уҡыу-уҡытыу буйынса урынбаҫары Ғәлиә Ғүмәрованың әйтеүенсә, ата-әсәләр белем биреү планындағы үҙгәрештәр буйынса бер ниндәй ҙә дәғүә белдермәгән. Бында Дәүләкән генә түгел, эргәләге Әлшәй һәм Шишмә райондарынан да ҡыҙҙар һәм малайҙар килеп уҡый. Ҡалаға яҡын ауылдарҙан йөрөп белем алыусыларҙы иһә махсус автобус йөрөтә. Шуға балалар өсөн был график бик уңайлы һәм ҡулай­лы: ата-әсәләре, туғандары янында күберәк булалар һәм яратҡан түңәрәктәренә иркенләп йөрөйҙәр. Мәҫәлән, Башҡорт дәүләт медицина университеты уҡытыусылары үткәр­гән дәрестәр күптәргә табип һөнәрен һайларға булышлыҡ итмәй ҡалмаҫ. Башҡорт дәүләт университеты уҡы­тыу­сылары менән берлектә ойош­торолған Һәләтле балаларҙы үҫте­реү үҙәгенә йөрөгән балалар араһы­нан да киләсәктә, бәлки, ғалимдар сығыр. Шуныһы һөйөнөслө: ҡыҙҙар һәм малайҙар тәнәфескә сыҡҡан арала ла шахмат серҙәрен өйрәнә. Улар мәктәптә хатта был спорт төрө буйынса ярыштар үткәрә.

Белем усағында йәш быуынға патриотик тәрбиә биреүгә лә бик етди иғтибар бүленә. Бында утыҙ йылдан ашыу “ВАУРовец” эҙләү-илһөйәрлек клубы эшләй. Бөйөк Ватан һуғышы йылдарында мәктәп бинаһында разведчиктарҙың хәрби-авиация училищеһы урынлашҡан икән. Клуб ағзалары Бөйөк Ватан һуғышында ҡатнашыусылар, тыл хеҙмәтсәндәре тураһында төрлө мәғлүмәттәр йыя. Клуб етәксеһе Рима Шәфиғуллина хатта “Авторазведчиктар. Еңеү йылъяҙмаһы” тигән китап сығарған.

Апрель аҙағында 3-сө гимназия-интернат уҡыусылары Алмас Һөйәрем­бәтов, Миргулям Холматов һәм Игорь Иванов уҡытыусы Владимир Волков етәкселегендә Волгоград өлкәһенә Бөтә Рәсәй “Иҫтәлек вахтаһы” акцияһында – Сталинград яуы эҙҙәре буйлап тарихи эҙлә­неүҙәрҙә ҡатнашырға уйлай.

Айрат Нурмөхәмәтов фотолары