Әҙилә менән Зәриә мәктәпкә бара

Ҡулдарына сағыу сәскә гөл­ләмәләре тотҡан, ыҫпай кейен­гән бәләкәстәрҙе күреү – ниндәй бәхет! Шул иғтибарға лайыҡ, тиҙҙән 55 мең баланы респуб­ликабыҙҙың белем усаҡтары беренсе класҡа ҡабул итеп аласаҡ. Гәзитебеҙҙең күркәм традицияһынан был юлы ла тайпылманыҡ – мәктәпкә тәүгә уҡырға барған кескәйҙәрҙең Белем көнө алдынан редакция­быҙ­ға ҡунаҡҡа килеүенә һөйөн­дөк.

Быйыл “Башҡортостан” гәзи­тенең баш мөхәррир урын­баҫары Алһыу Әһлиуллинаның ҡыҙы Әҙилә тәүге тапҡыр партаға ултырасаҡ.

– Балалар баҡсаһында саҡта мәктәпкә әҙерлек төркөмөнә йөрөнөм, – ти Өфө ҡалаһының 21-се лицейына уҡырға барасаҡ ҡыҙ. – Уҡый беләм, һанайым, яҙырға өйрәндем. Инсаф абзыйым да ярҙам итте. Ҙур үҫкәс, табип буласаҡмын, кешеләрҙең тешен дауалаясаҡмын.

Әҙилә өйҙә әсәһенә ҡулынан килгәнсә ярҙамлаша икән – сәскәләргә һыу һибә, туҙан һөртә. Атаһы менән бергә “Әлифба”ны өйрәнгән.

“Ватандаш” журналының яуаплы секретары Рәүилә Ға­тауллинаның ҡыҙы Зәриә лә беренсе тапҡыр мәктәп ишеген асып инәсәк. Ул балалар баҡса­һында йыр, бейеү түңәрәктәрен ҡалдырмаған. Өйгә ҡайтҡас, туғандарына бәләкәй генә концерт ойошторған. Иң яратҡан шөғөлдәре – пазлдар, ҡыҙҙар өсөн конструкторҙар йыйыу. Ҡыҙ бигерәк тә дүрт йәшлек Рания һылыуы менән уйнарға ярата. “Ҙур үҫкәс, йырсы бу­лырға теләр инем”, – ти ул.

Өфөнөң 107-се лицейында уҡыясаҡ Зәриә һөйләүенсә, ул Гөлиә апаһы шикелле мәктәптә тырышып уҡыясаҡ, тыңлаусан һәм тәртипле буласаҡ.

Зәриә менән дә, Әҙилә менән дә әңгәмәләшкәндә шул күҙгә салынды: улар икеһе лә бик тыйнаҡ һәм ипле, уҡыуға дәрттәре уянғанын, мәктәпкә барыуҙы байрам итеп ҡабул итеүҙәрен тоймау мөмкин түгел. Минеңсә, былар барыһы ла тыуып-үҫкән бәрәкәтле йорт менән бәйле, атай-әсәйҙең матур тәрбиәһенән тора.

Бәләкәстәргә белем иленә матур сәйәхәт теләйбеҙ!