Риэлтор... Сажиҙә Игебаева ҡасандыр ошо һөнәр эйәһе булып китәсәген күҙ алдына ла килтермәй, әммә тормош башҡасараҡ шул.
Сажиҙә Нияз ҡыҙы Хәйбуллала тыуһа ла, бала сағы, йәшлеге Өфө районының Авдон ҡасабаһында үтә. Табиптар әсәһенә йәшәү урынын үҙгәртергә кәңәш бирә. Мәктәпте тамамлағас, йырсы булырға теләй, әммә атаһы етдиерәк һөнәр һайларға өндәй. Шулай итеп, ҡыҙ БДУ-ның тариф факультетына уҡырға инә. Уны тамамлағас, һигеҙ йыл тыуған яғында эске эштәр органдарында хеҙмәт итә.
– Хәйбуллала иркенлек етмәй башланы, – тип һөйләй Сажиҙә. – Ниәтемде атай-әсәйемә әйткәс, ҡаршы килмәнеләр. Шулай итеп, 2015 йылда Өфөгә киттем. Килеүен-килдем дә ул, баш ҡалала эш эҙләүе лә, баш терәр урын табыуы ла еңел түгел икән. Әлбиттә, эске эштәр органдарына алалар ине, әммә бындағы мәшәҡәтте үҙем генә беләм. Өйгә ҡайтыу юҡ тиерлек. Ә миңә бит баламды үҫтерергә кәрәк!
Эш тапҡансы берәүҙәрҙең өйөн йыйыштырып, икенсе урында иҙән йыуып көн күрә йәш ҡатын. Ҡарсәһенең, бер эштең дә ояты юҡ, тип бәләкәйҙән хеҙмәткә өйрәтеп үҫтереүе файҙаға ғына була. Тап ошо минутта хәлен аңлаған әсәһе Шәһиҙә апайға рәхмәт әйтеп бөтә алмай ул. Кескәй Искәндәрҙе һағынып, 600 саҡрым алыҫлыҡтағы Хәйбуллаһына үҙенең машинаһында ҡайтып килергә лә өлгөрә.
Көндәрҙең береһендә әхирәте Сажиҙәгә күсемһеҙ милек менән эш иткән компанияға агент булып килергә тәҡдим иткәс, ул аптырап ҡала.
– Бығаса риэлторҙарҙы алдаҡсылар һымаҡ ҡабул итә торғайным, сөнки уларҙың арҡаһында бәғзе берәүҙәрҙең торлағынан мәхрүм ҡалыуы хаҡында йыш ишетергә тура килде. Хатта атай-әсәйем дә, Өфө һынлы Өфөлә шунан башҡа эш бөткәнме ни, тине. Әхирәтем минең хаҡта директорға әйтеп тә ҡуйғайны, – тип хәтирәләргә бирелде Сажиҙә.
Бәхеткә күрә, компанияла бер нисә аҙна был эш нескәлектәренә өйрәтәләр. Ә ике аҙнанан һуң Сажиҙә тәүге эш һөҙөмтәһен күрһәтә – йәш ғаиләгә бүлмә алып бирергә ярҙам итә. Ноябрҙә эшкә урынлашҡан ҡыҙ киләһе айҙа дүрт кешегә фатир алыуҙа һәм һатыуҙа булыша. Кәйефе күтәрелә, эшкә дәрт уяна.
– Хәҙер риэлторҙарға ҡарата мөнәсәбәтем бөтөнләй үҙгәрҙе, – тип һөйләй Сажиҙә. – Кемгәлер ярҙамың тейеп, уларҙан рәхмәт ишетеү – үҙе бер бәхет. Ҡайһылары менән дуҫлашып киттек хатта. Аралашып йәшәйбеҙ, ҡунаҡҡа саҡыралар. Һәр эштәге кеүек, кеше менән яҡшы мөнәсәбәттә булыу мөһим. Теге йәки был фатирҙы тиҙерәк һатыу өсөн тырышып, ялғанға барһаң, мутлығың барыбер асыласаҡ. Шуға ла һәр кем менән ихлас, нисек бар, шулай аралашырға кәрәк. Ә тәжрибә эшләй-эшләй туплана.
Бер йылдан 200-ләп агентты берләштергән компанияла Сажиҙә Нияз ҡыҙы иң яҡшы унау исемлегенә инә һәм ике йыл буйы ошо исемлектән төшмәй.
– Бәғзеләр риэлторҙарҙы мут кеше тип уйлай. Йәшермәйем, ундайҙар ҙа бар. Әммә күптәр эшен намыҫ менән башҡара. Аҡсаны ғына уйлағанда, уңышҡа өлгәшеп булмай, кешенең күҙ йәшенән ҡурҡам. Нисек тә ғәҙел булырға, эште урынына еткереп, матур итеп башҡарырға тырышам... – Сажиҙә һөйләй, ә мин уны рәхәтләнеп тыңлайым.
– Үҙең башҡортса уҡымағанһың, ә ҡайһылай матур һөйләшәһең...
– Балалар баҡсаһында ла, мәктәптә лә рус телендә уҡырға тура килде. Шулай ҙа өйҙә гел башҡортса һөйләштек. Хәйбуллаға ҡайтҡанда, өләсәйҙәремдән өйрәндем. Бер ваҡыт кәштәлә Зәйнәб Биишеваның “Кәмһетелгәндәр” романын күреп ҡалдым. Уҡығы килә бит, әммә ҡайһы бер хәрефтәрҙе белмәйем. Әсәйем уларҙы өйрәткәйне, уҡып алдым да киттем. Шулай итеп, өс романды ла уҡып сыҡтым.
Буш ваҡыттарында төрлө китап уҡырға ярата Сажиҙә. Концерттарға, театрға йөрөй. Уның һәр сәғәте билдәләнгән. Аҙнаһына өс тапҡыр фитнесҡа барырға ла өлгөрә.
– Тормош аҡса эшләүҙән генә тормай. Донъяның матурлығын тойоп йәшәргә кәрәк. Кешегә асыу һаҡламаҫҡа тырышам. Был эшеңдә, тормошоңда мәшәҡәт тыуҙыра. Үҫмерҙәрҙең дә, өлкәндәрҙең дә һау-сәләмәт тормош өлгөһөнә күсә барыуы һоҡландыра.
Яҙмышынан ҡәнәғәт Сажиҙә Нияз ҡыҙы. Ҡала үҙәгенән бер бүлмәле фатир һатып алған, улы Искәндәр йүгереп йөрөй. Алла бойорһа, йырҙарын да яҙҙырырға уйы юҡ түгел. Күптән түгел тәүәккәл ханым күсемһеҙ милек һатыу буйынса үҙенең “Мегаполис-недвижимость” компанияһын ойошторған. “Үҙ-үҙеңә ышанырға кәрәк”, – тип йылмая мөләйем ханым.