Үҫентеләренә сират торалар

Ғәлиә Муллайән ҡыҙы – һөнәре буйынса уҡытыусы. Үҫентеләр донъяһына бәләкәйҙән ғашиҡ ҡыҙ юғары белем алып, яҙмышын мәктәп менән бәйләй. Оҙаҡ йылдар уҡыу-тәжрибә участкаһына етәкселек итә. Ул районда беренсе булып йылытылған теплица ойоштора, балаларҙа ергә ҡарата һөйөү тәрбиәләй, емеш-еләк үҫтереү нескәлектәрен өйрәтә. Уҡыусылары менән Мәскәүгә барып, Халыҡ хужалығы ҡаҙаныштары күргәҙ­мәһендә ҡатнаша. Уларҙың эш тәжрибәһенә бүтәндәр һоҡланып ҡарай, кәңәш һорай.

Тап шуға ла оҙаҡ йылдар ошо эш менән мәшғүл булған халыҡ 2015 йылда үҙенең крәҫтиән ху­жалығын булдырырға йөрьәт итә. Тормош иптәше Әлфис Мөғтәсим улының да һөнәре буйынса биология уҡытыусыһы булыуы фай­ҙаға ғына. Бөгөн был хужалыҡтың даны районда ғына түгел, бөтә республикаға билдәле булыуы, яҡшы һөҙөмтәләргә өлгәшеүе Мө­ғәл­лимовтар ғаиләһенең берҙәм, бер-береһен аңлап эш итеүендә. Мәҫәлән, өлкән улдары Илгиз менән ҡатыны Резеда техниканың төҙөклөгө, үҫентеләрҙе, емеш-еләкте халыҡҡа еткереү өсөн көс һала. Ә Башҡортостан дәүләт аграр университетында агроном һөнә­ре буйынса диплом алған кесе улдары Рөстәм хужалыҡтың эшмәкәрле­гендә талап ителгән ҡағиҙәләрҙе һаҡлау өсөн тырыша, ҡатыны Лилиә теплица хужалығы өсөн яуап­лы. Медицина университетын тамамлаған ҡыҙҙары Гөлнар документтар, ойошмалар менән сауҙа килешеүҙәре төҙөй. Кейәүҙәре Азамат иһә декоратив культуралар үҫтереү менән мәшғүл.

– Теләге булған кешегә төрлө дәүләт программалары бар. Бары иренмәҫкә кәрәк, – ти Ғәлиә ханым. – Эш башлағас, 1497600 һум күләмендә субсидия юлланыҡ. Был аҡсаға трактор, культиватор, үҫенте ултыртыу техникаһы һатып алдыҡ.

Уңған ғаиләнең эш һөҙөмтәһе бөгөн районда күптәрҙә һоҡланыу уята. 28 гектар майҙанда нимә генә үҫмәй! Бында төбәккә яраҡлаш­тырылған емеш-еләк, декоратив ағастар, ҡыуаҡтар...

– Һатып алыусыларға кәрәкле сортын һайларға, нисек тәрбиә­ләр­гә кәңәштәр бирәбеҙ, – тип һүҙен дауам итә Ғәлиә Муллайән ҡыҙы. – Эшебеҙҙе намыҫ менән башҡарғас, беҙҙе ихтирам итәләр. Республиканың алыҫ райондарынан да үҫенте һорап килеүҙәре шул хаҡта һөйләй. Халыҡ ҡыҙыҡ бит ул – берәйһе беҙҙән ағас алып, ул ергә ерегеп, уңыш бирә башлаһа, таныш-тоноштарына, дуҫ­тарына һөйләй, кәңәш бирә. Аллаға шөкөр, әлегә берәүҙең дә зарланғаны юҡ.

Мөғәллимовтарҙы республика күләмендә үткәрелгән күргәҙмә­ләр­ҙә, йәрминкәләрҙә йыш күрергә мөмкин. Берәүҙәр Борай уңғанда­ры­ның балланып бешкән емеш-еләген һайлаһа, икенселәре улар­ҙың бөтмөрлөгөнә һоҡлана, өсөн­сөләр иһә, уларҙан күреп, баҡса­сылыҡҡа тотона...

Борай районы.