Францияла “тыуған” балыҡтар Башҡортостанда ла шәп үҫә

– Был кәсеп, әлбиттә, еңелдән һаналмай, етмәһә, кеҫәнән аҡса ла сығарырға тура килә, – ти эшҡыуар. – Табышлы һәм уңышлы эшләү өсөн иң кәмендә йылына 50 тоннаға яҡын балыҡ үрсетергә кәрәк. Әлегә миңә был тармаҡты артабан үҫтереү өсөн эшләргә лә эшләргә әле.

Саҡмағош районында тыуып үҫкән егеттең хужалығында бөгөн 78 меңгә яҡын селбәрә "тәрбиәләнә", уларҙы аяҡҡа баҫтырғансы арыу уҡ тырышлыҡ һалырға кәрәк Рәсүлгә.

Бөгөн бында балыҡ үрсетеүҙең тулы циклы ҡулланыла. Бағыр үрсетеү өсөн ыуылдырыҡты эшҡыуар Франциянан һатып ала. Киләсәктә Рәсүл район, республика ҡулланыусыларын сифатлы һәм иң мөһиме – арзан балыҡ менән тәьмин итеүҙе маҡсат итеп алған. Тимәк, алдағы көндәрҙә Францияла "тыуып", Башҡортостан йылғаларында "буй еткергән" бағырҙарҙы ашап ҡыуанырбыҙ әле.