Ирекмәндәр ярҙамға ашыға

Хакимиәттең Йәштәр һәм спорт комитеты, “Атайсал” ха­лыҡты социаль хеҙмәтләндереү үҙәге, “Берҙәм Рәсәй” партия­һының Бөрйән районы бүлексәһе ошо йүнәлештә эш алып бара.

Кемгәлер аҙыҡ-түлек алырға, коммуналь хеҙмәттәр өсөн тү­ләргә кәрәк, кемдер дарыуханаға ла бара алмай. Ошо ваҡытта уларға ярҙамға ирекмәндәр ашыға. Эйе, пандемия янаған осорҙа оло кешеләргә һаулыҡ­та­рын ҡурҡыныс аҫтына ҡуйма­йынса, мәрхәмәтле һәм әүҙем йәштәрҙең ярҙамынан файҙала­ныуҙары хәйерле.

– Әлеге мәлдә 55 ирекмән иҫәпләнә, әммә ярҙам күрһәтергә теләүселәр һаны көндән-көн арта. 50 кеше резервҡа алынған, ярҙам талап ителһә, улар ҙа йәлеп ителәсәк. Ирекмәндәр социаль хеҙмәткәрҙәр менән берлектә 65 йәштән оло ағай-апайҙарға, хәрәкәт мөмкинлеге сикләнгән граждандарға аҙыҡ-түлек, дарыу һатып алыуҙа, кәрәк икән, коммуналь хеҙмәтләндереү өсөн түләүҙәрҙә булышлыҡ итә. Күп балалы, аҙ тәьмин ителгән ғаиләләр ҙә иғтибарҙан ситтә ҡалмай, – ти Бөрйән районы ха­кимиәтенең йәштәр һәм спорт комитеты белгесе, ирекмәндәр штабы етәксеһе Илһам Ишкинин.

Ирекмәндәр барыһы ла интернет аша онлайн-әҙерлек үтеп, квалификациялы инструктаж алған. Әлбиттә, күп нәмәгә эш барышында ла өйрәнергә тура килә. Мотлаҡ үтәлергә тейешле талаптар ҙа бар, мәҫәлән, ирек­һеҙҙән инфекция таратмаҫ өсөн ирекмәндәр оло кешеләрҙең йортона йә фатирына инергә тейеш түгел. Адресатҡа сығыр алдынан ҡул дезинфекциялана, битлек һәм бирсәткә кейәләр.

Эш өс йүнәлештә ойошторол­ған. Бер төркөм тәүлек әйләнә­һенә ярҙамға мохтаждарҙан заявкалар ҡабул итә, ошо маҡсатта “ҡыҙыу линия” эшләй. Мөрәжә­ғәт ҡабул ителгәс, шунда уҡ үҙәккә хәбәр ителә – кәрәкле аҙыҡ-түлек хәстәрләнә, талап ителгән дарыу һ.б. әйберҙәр һа­тып алына. Өсөнсө төркөм ошо әйберҙәрҙе тәғәйен адрестар буйынса илтеп бирә.

– Күпселек беҙҙән һөт, икмәк, май кеүек көндәлек ризыҡ килте­реүҙе үтенә. Ирекмәндәр аҙыҡ-түлекте үҙ иҫәбенә ташымай, беҙ оло кешеләрҙең үҙҙәренең аҡса­һына ризыҡ йә дарыу һатып алырға ярҙам итәбеҙ.

Шулай ҙа һуңғы ваҡытта эшҡыуарҙар әүҙемләшә башланы. Ауыр тормош хәлендә ҡалған кешеләргә аҙыҡ-түлек, аҡсалата ла ярҙам күрһәтергә теләүселәр бар. Ошоно иҫәпкә алып, беҙ Ярҙам фонды булдырҙыҡ. Унда йыйылған аҡсаға, күмәртәләп һатыу урындарынан осһоҙораҡҡа тауар алып, мохтаждарға өләшә­беҙ, – ти штаб етәксеһе.

Район үҙәгендә генә түгел, ауылдарҙа ла ирекмәндәр ойоша башлаған. Әйткәндәй, ирекмән­лек менән йәп-йәш ҡыҙ-егеттәр, студент-уҡыусылар ғына шөғөл­ләнә тип уйлағандар яңылыша, ирекмәндәр араһында учреждение хеҙмәткәрҙәре, ғаиләле кеше­ләр ҙә бар, эшҡыуарҙар байтаҡ.

Әлфиә Ғәләүетдинова – бер бала әсәһе. Үҙенең шәхси бөҙрә­ханаһы бар. Карантин ваҡытын файҙаланып, кешеләргә ярҙам итеү маҡсатынан эшлекле ҡатын битлектәр тегә башлай. Бөтәһе 500-ләп битлек тегеп, райондаштарына бушлай тарата. Һуңынан ирекмәндәр хәрәкәтенә ҡушыла.

– Ирекмәндәр хәрәкәте тура­һында әхирәтем Регина Юлмө­хәмәтованан ишетеп ҡалдым. Ул да – шәхси эшҡыуар, “Хәләл” магазины хужаһы, иң әүҙем ирекмәндәрҙең береһе. Интернет аша онлайн-әҙерлек үтеп, квалификациялы инструктаж алғас, танытма бирҙеләр. Тормош иптәшем автозаправкала өлкән опе­ратор булып эшләй, буш ваҡытында ул да ярҙам итә. Шәхси автомобилебеҙҙә район­дың ауылдарында йәшәүсе мох­таждарға һораған әйберҙәрен илтәбеҙ. Бик йылы ҡабул итәләр. Кешеләрҙең рәхмәтен ишетеп, үҙебеҙ ҙә ҡыуанабыҙ, – ти ирек­мән.

Быға тиклем дә оло кешеләргә ярҙам күрһәтеү менән шөғөл­ләнгән “Атайсал” үҙәге штатында 26 хеҙмәткәр иҫәпләнә. Шулар­ҙың өсәүһе – медиктар. Коронавирус пандемияһы арҡаһында хеҙмәткәрҙәрҙең эш даирәһе тағы ла киңәйгән.

Социаль хеҙмәткәрҙәр коронавирус хәүефе янаған төбәктәрҙән килгән граждандарҙың йәшәгән урындарын байҡауҙа ла ҡатнаша, ҡурсаланған ололарҙың хәл-әхүәлен дә белешә, йомоштарын үтәй. Аҙна башында, мәҫәлән, БР Һаулыҡ һаҡлау министрлығынан районда теркәлгән 52 хроник сирленең исемлеге ебәрелгән. Үҙәк хеҙмәткәрҙәре уларҙы ла хәстәрләйәсәк.

Күптән түгел Өфөнән “Изгелек” хәйриә фонды аҙыҡ-түлек йыйылмалары ебәргән, шулар­ҙың 56-һы район мохтаждары өсөн тәғәйенләнгән.

– Дуҫ яуҙа һынала, тиҙәр. Бындай ҡатмарлы осорҙа Бөрйән халҡының шулай берләшеп, ауырлыҡтарҙы бергә еңергә ынтылыуы маҡтауға ғына лайыҡ. Бигерәк тә йәштәрҙең, эшҡы­уар­ҙарҙың әүҙемлеге һоҡлан­дыра. Был хәүефле ваҡытта бер-беребеҙгә, бигерәк тә ололарға, мохтаждарға иғтибарлы һәм ихтирамлы булайыҡ, ул саҡта бер сир ҙә ҡурҡыныс булмаҫ, – тигән теләктәрен еткерҙе “Атайсал” үҙәге етәксеһе Зөһрә Айыт­ҡолова.