Ватан һаҡсылары – төп терәгебеҙ

Бөгөн барлыҡ Рәсәй халҡы Ватанды һаҡлаусылар көнөн билдәләй. Ул һәммәбеҙ өсөн яҡын байрам, сөнки һәр ғаилә илебеҙҙе һаҡлаған һалдат үҫтергән, ата-бабаларыбыҙ яу яландарында ятып ҡалған. Бөгөн дә Ватан һаҡсылары илебеҙҙең төп терәге булып ҡала.

Республикала был көн уңайынан төрлө саралар уҙғарарыла. Бөгөн Өфөнөң “Торатау” конгресс-холында байрам айҡанлы тантаналы сара үтте. Унда Башҡортостан Башлығы Радий Хәбиров, хәрбиҙәр, хаҡлы ялдағы офицерҙар, Рәсәй Геройҙары, кадеттар һәм башҡалар ҡатнашты.

Тантананың төп өлөшөндә республика Башлығы Радий Хәбиров сарала ҡатнашыусыларҙы Ватанды һаҡлаусылар көнө менән ҡотланы.

– Тыуған илде ҡоралһыҙ ҙа һаҡларға була. Беҙ пандемия шарттарында кеше ғүмерҙәрен ҡотҡарған табип һәм шәфҡәт туташтарының ысын батырлығын күрәбеҙ. Тышҡы сәйәси аренада илебеҙҙең мәнфәғәттәрен яҡлаған Рәсәй дипломаттарының тырышлығы юғары баһаға лайыҡ. Олимпиадала ҡатнашыусыларҙы ла ҙурлап баһалайбыҙ, улар көслө баҫым аҫтында иленең спорт намыҫын һаҡланы. Ҡыҙғанысҡа ҡаршы, Бөйөк Ватан һуғышы, башҡа хәрби хәрәкәттәр ветерандары йылдан-йыл кәмей. Ватан һаҡсыларының исемдәре беҙҙең йөрәктәрҙә мәңге һаҡланыр, – тине сығышында Радий Хәбиров.

Башҡортостан Башлығы батырлыҡ һәм ҡаһарманлыҡ күрһәткән яҡташтарыбыҙға Миңлеғәле Шайморатов орденын тапшырҙы. Был юлы оло награда менән Өфө ҡалаһының хәрби комендатура (3-сө разрядлы гарнизон) хәрби коменданты майор Валентин Николаевич Солодовник, Ҡырмыҫҡалы һәм Архангел райондарының хәрби комиссары Ринат Нуретдин улы Ғималов, Өфө ҡалаһының 2-се дауалау-профилактика бүлексәһе мөдире, табип-стоматолог Гүзәлиә Рифғәт ҡыҙы Вәлиева, Рәсәй Эске эштәр министрлығының Баймаҡ районы буйынса бүлегендәге тәфтиш бүлеге тәфтишсеһе Тимур Айҙар улы Кәлимуллин, Рәсәй Милли гвардияһы ғәскәренең Волга буйы округындағы генерал-майор Миңлеғәле Шайморатов исемендәге 29-сы махсус тәғәйенләнештәге отрядының элемтә взводы махсус бәйләнеш төркөмөнөң һәм хәрби тәьминәт мәғлүмәт технологияһы төркөмөнөң баш белгесе Владимир Валерьевич Максимов, Башҡортостан буйынса Эске эштәр министрлығының наркотиктар әйләнешенә контроль идаралығының махсус тәғәйенләнештәге “Гром” отрядындағы 2-се хәрби бүлексәнең айырыуса мөһим эштәр буйынса өлкән оперуполномоченныйы, полиция майоры Айҙар Наил улы Хәтмуллин, 2-се анестезиология-реанимация бүлексәһе мөдире, табип-анестезиолог-реаниматолог Илнур Вахит улы Мәсәлимов бүләкләнде.

Республика Башлығы сығышында төбәгебеҙҙә илһөйәрлек һәм хәрби хеҙмәткә тиклемге тәрбиә биреү йүнәлешендә яҡшы традициялар булдырылыуы тураһында ла әйтте. Башҡортостанда ветерандар берлеге һәм туғанлығы, хәрби-илһөйәрлек клубтары һәм берләшмәләре, юнармия һәм эҙәрмәндәр отрядтары, кадет уҡыу йорттары, “Шайморатовсылар” кластары бар, тип билдәләне ул.

Йыл һайын мәктәпте тамамлаған 200-ҙән ашыу уҡыусы хәрби юғары уҡыу йорттарында белем алыуын дауам итә. Былтыр республиканан дүрт меңгә яҡын егет илебеҙҙең хәрби көстәрен тулыландырған. Хәрби хеҙмәткә тиклемге әҙерлек, саҡырыу һәм мобилизация әҙерлеге буйынса республика иң яҡшылар иҫәбендә.

Республика Башлығы сығышында Әлкә ҡасабаһында “Илһөйәр” паркын булдырыу буйынса эш алып барылыуы тураһында әйтте. Был йәһәттән Рәсәй Оборона министрлығы ла ярҙам итә – хәрби техника өлгөләрен тапшыра. Үҙәк 2024 йылға әҙер буласаҡ.

– 9 июлдә билдәле датаны байрам итәбеҙ – республиканың арҙаҡлы улы, ике тапҡыр Советтар Союзы Геройы Муса Ғайса улы Гәрәевтең тыуыуына 100 йыл туласаҡ. Уның исеме Башҡортостандың һәр кешеһенә ҡәҙерле һәм ул Бөйөк Ватан һуғышы йылъяҙмаһына ингән. Легендар осоусы-штурмлаусы хөрмәтенә ойошторолған саралар башҡорт еренең батыр улдары иҫтәлеген мәңгеләштереү буйынса эшебеҙҙең дауамы буласаҡ, – тип билдәләне Радий Фәрит улы.

Башҡортостан Башлығы республиканың эшсән халҡына һәм хәрби хеҙмәткәрҙәренә намыҫлы хеҙмәттәре, ҡаһарманлыҡтары өсөн рәхмәт белдерҙе.

Сара байрам концерты менән тамамланды.

Фотолар: glavarb.ru