Өфөлә өс мең шәм тоҡандырылды

Бөгөн Өфө ҡалаһының Еңеү паркында Украиналағы махсус хәрби операцияла хәрби бурыстарын үтәгән Рәсәй һалдаттарына ярҙамды сағылдырыу маҡсатында өс мең шәм тоҡандырылды.

Акцияла Берҙәм Рәсәйҙең "Йәштәр гвардияһы” Бөтә Рәсәй йәмәғәт ойошмаһының төбәк бүлексәһенән өс мең самаһы йәш гвардиясы, йәмәғәт һәм ветерандар ойошмаһы вәкилдәре ҡатнашты. Һәләк булғандарҙы бер минут тын ҡалып иҫкә алғас, улар тоҡандырылған шәмдәрҙән Рәсәй хәрби хеҙмәткәре һынын төҙөнө.   

Өфө ҡалаһы Совет районының “Йәштәр гвардияһы” етәксеһе Александр Теляков билдәләүенсә, улар бындай акцияларҙы даими ойоштора.

"Былтыр сараны Совет майҙанында үткәрҙек һәм генерал Миңлеғәле Шайморатов иҫтәлегенә бағышланыҡ. Бөгөнгө акция аша Рәсәй һалдаттарына, беҙҙең яҡташтарға, Украиналағы махсус операцияла ҡатнашыусыларға ярҙамыбыҙҙы белдерҙек", – тип хәбәр итте ул.  

Фото һәм мәғлүмәт сығанағы: Өфө ҡала хакимиәте сайты.