Батыр һалдат булып хәтерҙә ҡалды

Башҡортостан "Китап" нәшриәтендә 2016 йылда республиканың "Диңгеҙ йыйылышы" төбәк йәмәғәт ойошмаһы тырышлығында "Рәсәй Геройҙары – беҙҙең дәүер геройҙары" тигән китап сыҡҡан. Уның төҙөүсеһе – офицер, запастағы майор, Төньяҡ Кавказдағы террорсылыҡҡа ҡаршы операцияла ҡатнашҡан Рәсәй Журналистар союзы ағзаһы Евгений Смирнов.

2020 йылда тулыландырылған икенсе китап нәшер ителгән. Һуңғы аралағы хәрби-патриотик тәрбиә темаһының көнүҙәккә әйләнеүе айҡанлы, Евгений Алексеевич Смирнов "Панорама Башкортостана" журналына интервью биргән һәм беҙҙең яҡташыбыҙ – Өфө ҡалаһынан Александр Доставаловтың батырлығы тураһында һөйләгән.

Александр Васильевич Доставалов 1963 йылдың 17 июлендә Өфөлә хәрбиҙәр ғаиләһендә тыуа. Армияға тиклем Севастополь судно төҙөү техникумында уҡый, Симферополдә заводта эшләй, Орскиҙа тепловоз машинисы ярҙамсыһы була.  

1981 йылда әрмегә алына. Литвала, Рязандә була. 76-сы гвардия һауа-десант дивизияһының 104-се гвардия парашют-десант полкында хеҙмәт итә. Ереван, Баҡы, Ош, Узген, Днестр буйында тыныслыҡ урынлаштырған ғәскәрҙәр сафында бурысын үтәй.

1994 йылда данлыҡлы 6-сы рота командиры итеп тәғәйенләнә. Беренсе Чечен һуғышында ҡатнаша. Ҡаһарманлыҡ ордены менән наградлана.

Икенсе Чечен һуғышы ваҡытында 104-се гвардия парашют-десант полкының 2-се парашют-десант батальоны командиры урынбаҫары була. 2000 йылдың 29 февралендә 6-сы ротаның чечен боевиктарына ҡаршы алышы мәлендә 4-се рота менән күрше бейеклектә нығына. 1 март төнөнә ҡарай өсөнсө взвод һуғышсылары менән 6-сы ротаға ярҙамға бара. Төркөм бурысты үтәй.

1 марттағы алыш мәлендә бөтә десантсылар тиерлек һәләк була. Алты ғына кеше иҫән ҡала. Александр Доставалов бер нисә тапҡыр яралана, әммә етәкселек итеүен ташламай. Сираттағы тапҡыр йәрәхәт алыуы үлемесле була.

Яҡташыбыҙ Псков ҡалаһы зыяратында ерләнгән. Уның исеме хәрби частың хәрби дан исемлегенә индерелгән. Майор Доставалов исеме урамдарға бирелгән. Өфөләге Ҡайғы кисергән әсә мемориалында уның исеме ташҡа уйып яҙылған. Ишембайҙа Волга буйы федераль округының Башҡорт кадет корпусы уның исемен йөрөтә, 2020 йылда геройға бюст ҡуйылған. Ямал-Ненец автономиялы округының Губкинский ҡалаһында Александр Достовалов исемендәге "Форпост" хәрби-патриотик клубы эшләй.

Батырҙар онотолмай. Улар йәш быуында илһөйәрлек рухы тәрбиәләй. Яҡташыбыҙ Доставалов исеме генерал Шайморатов, Александр Матросов һәм Башҡортостандың башҡа данлыҡлы улдары исемдәре менән йәнәш торорға лайыҡлы.

Сығанаҡ: Галина Салихова, "Панорама Башкортостана".

Фото: "Панорама Башкортостана".