“Патриот” паркында - Рәсәй Геройына стела

Бөгөн Шишмә районындағы “Патриот” паркында Башҡортостан Башлығы Радий Хәбиров Рәсәй Геройы, махсус хәрби операцияла ҡатнашҡан Максим Серафимов хөрмәтенә стела ҡуйыу тантанаһында ҡатнашты.

Сарала Максим Серафимовтың ата-әсәһе лә – Владимир Викторович менән Алина Олеговна, республика министрлыҡтары, ведомстволары етәкселәре, муниципалитет башлыҡтары, йәщтәрҙең илһөйәрлек ойошмалары әүҙемселәре, хәрби хәрәкәт ветерандары булды.

Радий Хәбиров Рәсәй Геройы стелаһына сәскәләр һалды һәм республикала Ватанды һаҡлаусылар иҫтәлеге һәр ваҡыт һаҡланасағын, уларҙың ғаиләләре тураһында хәстәрлек күреләсәген билдәләне.

“Бөгөн бик мөһим көн. Беҙ Рәсәй Геройы Максим Серафимов хөрмәтенә стела асабыҙ. Шулай итеп, данлыҡлы яҡташыбыҙҙың иҫтәлегенә хөрмәт белдерәбеҙ. Һеҙ барығыҙ ҙа уның батырлығы тураһында беләһегеҙ. Ҡаһарман яҡташтарыбыҙға һоҡланабыҙ, улар менән ғорурланабыҙ. Мин өс исемде атайым: Максим Серафимов – рус, Игорь Нәсибуллин – удмурт, Тамерлан Илһамов – башҡорт. Өс Рәсәй Геройы, өс төрлө милләт вәкиле. Бөтә ил һәм республика үҙ азатлығы өсөн көрәшә, Донбассты яҡлай. Геройҙарға мәңгелек дан!” – тине сығышында Радий Хәбиров.

Белешмә өсөн: Максим Серафимов Василий Маргелов исемендәге Рязань юғары һауа-десант команда училищеһын тамамлаған. Махсус хәрби операцияла тәүге көндәренән алып ҡатнашҡан. Һуңғы алышында дошмандың һан яғынан өҫтөн булған һөжүмен кире ҡаҡҡан, шул мәлдә өлкән лейтенант Серафимов милләтселәр ырғытҡан гранатаны үҙ тәне менән ҡаплаған. Ғүмере хаҡына ҡоралдаш иптәштәрен һәләкәттән ҡотҡарған. Хәрби бурысын үтәгәндәге ҡаһарманлығы өсөн уға үлгәндән һуң Рәсәй Геройы исеме бирелде. 1 августа Башҡортостан Башлығы Радий Хәбиров Максим Серафимовтың ата-әсәһенә Геройҙың Алтын йондоҙон тапшырҙы.  Башҡортостан Башлығының Указы менән “Патриот” паркына Максим Серафимов исеме бирелде.

Фото: giavarb.ru