Мобилизацияланғандарҙың ғаиләләре иғтибар үҙәгендә булырға тейеш

Бөгөн Хөкүмәттең Республикаға идара итеү үҙәгендә ойошторолған аҙналыҡ кәңәшмәһендә Башҡортостан Башлығы Радий Хәбиров өлөшләтә мобилизацияға бәйле һуңғы яңылыҡтар менән уртаҡлашты.

Уның белдереүенсә, республикала был кампания ойошҡан үткән.

– Ойошҡан үтте, военкоматтарға сираттар булды, доброволецтар күп ине. Әлбиттә, еңел булманы. Яҡташтарыбыҙға ҙур рәхмәт. Беҙ егеттәребеҙгә ярҙам итә, уңайлы шарттар булдыра, уларға аҙыҡ-түлек ебәрә алабыҙ. Хакимиәт башлыҡтары айына ике тапҡыр улар янына барып килә, ниндәйҙер көнкүреш шарттарын яҡшырта ала. Мобилизацияланғандарҙың ғаиләләренә лә ярҙам итергә кәрәк, – тине Радий Хәбиров.

Республика етәксеһе ярҙам күрһәтер өсөн мобилизацияланғандарҙың ғаиләләре реестрын булдырырға тәҡдим итте.

– Был мәсьәләлә бик иғтибарлы булырға кәрәк. Барлыҡ муниципалитеттарҙа ла киткәндәрҙең ғаиләләре реестрын булдырыуҙы һорайым. Был ауыр түгел. Беҙҙә штаб бар, ул көндәлек ярҙам күрһәтеүгә йүнәлтелгән, – тине Радий Фәрит улы.

Фото: "Башинформ".