Резервтағы офицерҙарҙы ла оҙаттылар...

5 октябрҙә Республика саҡырыу пунктынан запастағы офицерҙар иҫәбенән өлөшләтә мобилизацияға эләккән граждандарҙы оҙатыу тантанаһы үтте. Юғары уҡыу йорттарында хәрби кафедра тамамлаған, шулай уҡ Рәсәй Ҡораллы Көстәрендә офицер дәрәжәһендә хеҙмәт иткән ир-егеттәр ҙә хәрби әҙерлек үтеү урындарына юлланды.

Оҙатыу тантанаһында Башҡортостан Республикаһы Хәрби комиссариатының граждандарҙы хәрби хеҙмәткә әҙерләү һәм саҡырыу бүлеге начальнигы Сергей Нетунаев, һауа-десант ғәскәрҙәре ветераны Радик Ғәбиҙуллин, дини конфессиялар вәкилдәре ҡатнашты.

– Хәрби әҙерлек барышында үҙегеҙҙе һәм ҡул аҫтындағы һалдаттарҙы яҡшы әҙерләүегеҙҙе теләйем. Иң мөһиме - тыуған республикаға иҫән-һау әйләнеп ҡайтығыҙ, – тип теләктәрен еткерҙе Сергей Нетунаев.

Митингтан һуң мобилизацияланған офицерҙарға туғандары һәм яҡындары менән хушлашыуға ваҡыт бирелде. Унан һуң резервта булған яҡташтарыбыҙ хәрби әҙерлек урынына юлланды.

Фото: рәсми сығанаҡтан.