Шайморатовсыларҙа – 80 дәүләт наградаһы

Бөгөн Хөкүмәттең Республикаға идара итеү үҙәгендә ойошторолған аҙналыҡ кәңәшмәһендә Башҡортостан Башлығы Радий Хәбиров Миңлеғәле Шайморатов исемендәге батальон егеттәренә бәйле һәйбәт яңылыҡ белдерҙе. Яугирҙәргә Ватан Геройҙары көнөндә ҡыҫҡа ваҡытлы ял итеү урындарында Башҡортостан Башлығы исеменән Шайморатов ордены, республиканың дәүләт наградалары, балаларҙан хаттар һәм һүрәттәр, шулай уҡ хәрби бурыстарҙы үтәү өсөн махсус ҡорамалдар тапшырғандар.

– Эксперттарҙың һүҙҙәренсә, башҡорт яугирҙәре бик юғары хәрби рух, профессионализм күрһәтә һәм ҙур абруй ҡаҙана. Махсус хәрби операцияла ҡатнашыусылар араһында үҙ эштәре һөҙөмтәһендә, ҡыҫҡа ваҡытта 80-дән ашыу яугир Рәсәйҙең дәүләт наградаларына тәҡдим ителде, – тине “Берҙәм Рәсәй”ҙең төбәк башҡарма комитеты етәксеһе Руслан Насретдинов.

Шулай уҡ Радий Хәбиров Башҡортостандың доброволецтары батальоны балалары уҡыған мәктәптәрҙә “шайморатов кластары” булдырырға тигән тәҡдимде хупланы һәм республиканың мәғариф һәм фән министрлығына мәсьәләне өйрәнергә ҡушты. Башҡортостан һәр ваҡыт беҙҙең егеттәргә һәм уларҙың ғаиләләренә ярҙам итәсәк тине.

Фото: srgazeta.ru