Герой партаһы булдырылды

Әбйәлил районының ҡаһарман улы, махсус хәрби операцияла батырҙарса һәләк булған Тамерлан Айсар улы Илһамовтың исемен мәңгеләштереү буйынса саралар дауам итә. Ошо көндәрҙә ул уҡыған Таһир Кусимов исемендәге гимназияла Герой партаһы булдырылды. Был класта уҡыусыларға илһөйәрлек һәм ватансыллыҡ сифаттарын тәрбиәләү маҡсатында батырлыҡ дәрестәре, Герой тураһында төрлө хәтер һәм ҡәҙер саралары үтәсәк. Уҡыусыларҙа үҙҙәре белем алған мәктәптә ҡасандыр Рәсәй Геройы уҡыуы хаҡында белеп, уның партаһын күреп ғорурлыҡ хисе уянасаҡ, батырҙарға ҡарата хөрмәт һәм ихтирам хисе тыуыр, ти мәктәп коллективы ла.

Гвардия зенит ракета батареяһының хәрби расчет командиры, гвардия прапорщигы Тамерлан Илһамов Әбйәлил районының Асҡар ауылында тыуып үҫкән. Быйыл 4 июлдә уның командованиеһы аҫтында хәрби расчет дошмандың һауа разведкаһын алып барып ракетаға ҡаршы һуғышҡа инә һәм дошманды тар-мар итеүгә өлгәшә. Күрһәткән батырлығы өсөн Тамерланға үлгәндән һуң Рәсәй Геройы исеме бирелә.

Геройҙарыбыҙға мәңгелек дан!

Фото: "Осҡон" гәзите.