Бәхил бул, Хәйбулла батыры...

Хәйбулла халҡы тағы бер батыр улын юғалтты. Махсус хәрби операция биләмәһендә лейтенант Наил Ғәббәсов батырҙарса һәләк булды. Кисә һуңғы юлға оҙатыу сараһында БР Дәүләт Йыйылышы - Ҡоролтай депутаты Салауат Рәхмәтуллин, район хакимиәте башлығы Рөстәм Шәрипов, Сибай ҡалаһы һәм Хәйбулла районы хәрби комиссары Ринат Зәбиров, хәрбиҙәр һәм район халҡы ҡатнашты. Улар һалдаттың ата-әсәһенең, туғандарының тәрән ҡайғыһын уртаҡлашты, батыр ул тәрбиәләгәндәре өсөн рәхмәт белдерҙе.

Район хакимиәте башлығы Рөстәм Шәрипов үҙенең "Бәйләнештә"ге сәхифәһендә был хаҡта яҙыу ҡалдырған.

"Бөгөн беҙ Ватаныбыҙ сиктәрен яҡлауға баҫҡан һәм был почетлы бурысты намыҫ менән һуңғы һулышына тиклем үтәгән яҡташыбыҙ, лейтенант Наил Ғәббәсовты һуңғы юлға оҙаттыҡ. Наил, башҡа хәрби иптәштәр кеүек үк, үҙ ваҡытында ерҙә тыныслыҡ өсөн көрәшкән атай-олатайҙарының эшен дауам иткән, әммә махсус хәрби операция үткәреү биләмәһендә һәләк булған. Ул хәйбуллалар күңелендә изге күңелле, ярҙамсыл һәм тәүәккәл булып мәңге һаҡланыр.

Беҙҙең һәм барыбыҙҙың да бурысы - Тыуған илен яҡлағандарҙың барыһын да - Бөйөк Ватан һуғышында, локаль һуғыштарҙа һәм конфликттарҙа ҡатнашҡандарҙың һәм хәҙер һеҙҙең менән тыныс тормошта йәшәү өсөн ғүмерен биргәндәрҙе һөр саҡ хәтерләү.

Хеҙмәт бурысын үтәгәндә күрһәткән батырлығы һәм ҡаһарманлығы өсөн Наил Батырлыҡ ордены менән наградлана (үлгәндән һуң). Бөгөн ҡыйыу һалдаттың яуҙаштары билдәләүенсә, яугир булыу - ул мәңге йәшәү. Лейтенант Наил Ғәббәсов яҡташтары күңелендә мәңге һаҡланыр!" - тип яҙҙы Рөстәм Динислам улы.

Наил Ғәббәсов Новосибирск юғары хәрби команда Жуков училищеһын тамамлағандан һуң, Ростов өлкәһенең хәрби часына хеҙмәткә оҙатыла. 2022 йылдың сентябренән махсус хәрби операцияла взвод командиры вазифаһында ҡатнаша.

Тыныс йоҡла, Наил! Һинең хаҡтағы яҡты хәтер йөрәктәребеҙҙә мәңге йәшәр, ә ҡаһарманлығың бер ваҡытта ла онотолмаҫ!