Өфөлә Ватан һаҡсыларын иҫкә алдылар

Бөгөн Өфөлә Ватандан ситтә үҙ бурысын үтәгәндә ҡаһарманлыҡ һәм батырлыҡ күрһәткән бөтә хәрбиҙәр иҫтәлегенә арналған "Ҡайғырыусы әсә" мемориалына сәскә һалыу тантанаһы үтте.

Тантанала Башҡортостандың Дәүләт Йыйылышы — Ҡоролтай Рәйесе Константин Толкачев, Башҡортостан Республикаһы Хөкүмәте Премьер-министры урынбаҫары Ирек Сәғитов, Өфө ҡала Советы рәйесе Марат Вәсимов, Өфө хакимиәте башлығының беренсе урынбаҫары Сергей Кожевников, Орджоникидзе районы хакимиәте башлығы Альберт Маликов, ветеран ойошмалары, хәрби-илһөйәрлек клубтары һәм йәмәғәт берекмәләре вәкилдәре, һәләк булған хәрбиҙәрҙең туғандары һәм яҡындары ҡатнашты.

Улар мемориалға сәскә һалды һәм һәләк булғандарҙы хөрмәтләп, бер минут тынлыҡ менән иҫкә алды.

Бөгөнгө иҫтәлекле дата – 1989 йылдың 15 февралендә Афғанстандан совет ғәскәрҙәрен сығарыу тамамланған көн. Был көндө Афған һуғышы геройҙары менән бер рәттән Ватаныбыҙ сиктәренән ситтә хәрби бурысын намыҫлы үтәгән барлыҡ һалдат-интернационалистар алдында миллионлаған кешеләр баш эйә.

Уларҙың батырлығы һәр ваҡыт өлгө булып ҡала. Улар шулай уҡ Ватандың бөгөнгө һаҡсылары – әле фронт һыҙығында булғандарҙың бөтәһе өсөн дә ысын батырлыҡ өлгөһө булып тора.

Фото һәм мәғлүмәт сығанағы: vk.com/ufa