"Беҙ бер-беребеҙгә ярҙам итәбеҙ"

Рәсәйҙең махсус хәрби операцияһында Башҡортостандан быға тиклем Кавказ, Сүриә һәм башҡа төбәктәрҙә ҡыҙыу нөктәләрҙе үткән күп яугирҙәр ҡатнаша.

Мәҫәлән, хәрбиҙәр, башҡа мобилизацияланған республика кешеләре менән бергә, Пенза өлкәһендәге биләмәләге полкта бурыстар үтәй. Башҡортостан юлдаш телевидениеһы журналисы Азат Саҙриевҡа биргән интервьюһында бер яугир ни өсөн махсус хәрби операцияла ҡатнашырға ҡарар итеүе хаҡында һөйләгән.

– Минеңсә, бөтә ир-егеттәр, дуҫтар барғанда, миңә лә әсәйемдең итәге артында йәшенеп ҡалырға ярамай. Беҙҙә яҡшы коллектив тупланған. Күп егеттәрҙең хәрби тәжрибәһе бар, беҙ бер-беребеҙгә ярҙам итәбеҙ. Мин дә хәрби хеҙмәт үткән кеше, – тине ул.

Яугирҙәргә армияла алған оҫталыҡты хәрби әҙерлек шымартырға ярҙам итте. Өҫтәүенә, хәҙерге заман ҡоралына ла, шулай уҡ иҫкермәгән “классика”ны — Калашников автоматын һүтеп-йыйыуға айырым иғтибар бүленә.

Башҡорт ирекмәндәре батальондары яугирҙәренең рухи остаздары Хәмзә-хәҙрәт һәм отец Виктор хуплап, дини йолалар үткәреп, фатихаларын биреп тора.

– Дин әһелдәре менән аралашыу үҙеңә, еңеүгә ышаныс өҫтәй. Был һалдаттарға, офицерҙарға ысынлап та кәрәк, тип уйлайым, — ти һалдаттарҙың береһе.

Ирекмән булып хеҙмәт итергә киткән республика хәрбиҙәренең батырлыҡтары тураһында даими һөйләп торабыҙ. Мәҫәлән, Шайморатов исемендәге ирекмәндәр батальонынан Рәмил Ҡурамшин, Марат Хәкимов һәм Денис Шафиҡов радио тулҡынды тотоп, махсус хәрби операцияла ауыр яралы 12 милләтсене асыҡлай. Шулай уҡ сержант Ринат Сәғитов хеҙмәттәштәрен миномет утынан ҡотҡарған.

Фото һәм мәғлүмәт сығанағы: Башинформ.