"Башҡа төбәк егеттәре беҙҙән көнләшә"

Бөгөн Өфөләге Конгресс-холда Ватанды һаҡлаусылар көнө уңайынан тантаналы йыйылыш үтте. Унда махсус хәрби операцияла ҡатнашҡан, әлеге ваҡытта 14 көнлөк ялға ҡайтҡан яугир Рәмил Исхаҡов та ҡатнашты. Ул Доставалов батальонында хеҙмәт итә.

– Махсус хәрби операция башланғас, күп уйланырға ваҡыт булманы. Илебеҙ Президенты, республикабыҙ Башлығы саҡырыуына теләктәшлек күрһәтергә, ундағы егеттәргә ярҙам итергә кәрәк ине. Минең хәрби тәжрибәм бар, алғы һыҙыҡҡа Доставалов батальоны доброволецтары менән киттем. Ҡайҙа барғанымды, нимә эшләгәнемде белә инем. Әҙерлек үткәндән һуң, сентябрҙән алғы һыҙыҡта булдыҡ. Беҙ унда бер ғаилә кеүек. Ҡурҡыу, үкенеү кеүек хистәр юҡ, тик бурысты үтәргә кәрәк. Йәш егеттәргә ярҙам итәбеҙ, тәжрибә уртаҡлашабыҙ. Әле 14 көнгә ялға ҡайттыҡ. Хәҙер Ватанды һаҡлаусылар көнө икенсе төрлө ҡабул ителә, мәғәнәһе айырыуса ҙур кеүек. Ялда бер буш көн юҡ. Һәләк булған егеттәрҙең туғандары менән осрашабыҙ, үҙебеҙҙекеләр менән дә бергә булырға кәрәк. Тағы шуны әйткем килә: беҙ махсус хәрби операция зонаһында республика ярҙамын ныҡ тоябыҙ, Радий Хәбировҡа ҙур рәхмәт был эште ойошторғаны өсөн. Ярҙамһыҙ ауыр булыр ине. Икенсе төбәктәрҙән яугирҙәр көнләшә хатта. Башҡортостан кешеләренә рәхмәт, улар ҙа ярҙам итә. Мин башҡа локаль конфликттарҙа ҡатнаштым, унда барыһы ла икенсе ине, бында икенсе. Әле беҙ дошмандарға ҡарағанда яҡшыраҡ һуғышабыҙ. Еңеү беҙҙә буласаҡ, быға бер кем дә шикләнмәй. Бөтә яугирҙәр ҙә иҫән-һау өйҙәренә әйләнеп ҡайтһын, – тине ул.

Айрат Нурмөхәмәтов фотоһы.