"Махсус хәрби операция биләмәһенән ҡайтып киләбеҙ"

Алдан хәбәр итеүебеҙсә, Сибай ҡалаһы, Баймаҡ районы хакимиәте башлыҡтары махсус хәрби операция биләмәһенә сираттағы гуманитар ярҙам алып барҙы. Улар араһында Темәс ауыл биләмәһе башлығы Айгөл Ғүмәрова ла бар. Был хаҡта Сибай мэры Азамат Юлдашбаев "Бәйләнештә"ге сәхифәһендә яҙған.

"Махсус хәрби операция биләмәһенән ҡайтып киләбеҙ. Яҡташтарыбыҙға кәрәкле ҡорамалдар, аҙыҡ-түлек, әйберҙәр, медикаменттар һәм посылкалар алып барҙыҡ. Күптәргә күстәнәстәрҙе шәхсән тапшыра алдыҡ, ә ҡалғанын адресаттарға хеҙмәттәштәре үҙҙәре тапшырырға вәғәҙә бирҙе. Беҙ башлыса яугирҙәр үҙҙәре һораған әйберҙәрҙе алып барҙыҡ, тағы ла нимәләр кәрәклеген асыҡланыҡ. Алғы һыҙыҡта - ысын яҙ, яугирҙәрҙең кәйефе лә күтәренке. Яҡташтар һәм шәхсән үҙемдең исемдән  гуманитар конвойҙы ойоштороуҙа ярҙам күрһәткәндәрҙең барыһына ла рәхмәт белдерәм. Берлектәге сәфәре өсөн ҡала советы депутаты Әхәт Аҫылбаевҡа, Арыҫлан Мөбәрәков исемендәге  башҡорт дәүләт драма театры директоры Илнур Әбдрәшитовҡа һәм бөтә коллегаларыма ҙур рәхмәт. Башҡортостан Республикаһының Мәҙәниәт министрлығына, Азат Шамил улы Бадрановҡа һәм беҙҙең мобилизацияланған яҡташыбыҙ Замир Йәнтүрингә айырым рәхмәт. Бергә булһаҡ, беҙ көслө! Һәм еңеү мотлаҡ беҙҙең яҡта буласаҡ!"- тип яҙған Азамат Юлдашбаев.

Фото: Азамат Юлдашбаевтың "Бәйләнештә"ге сәхифәһенән.