Улар иңенә ил хәстәре һалынған

Ҡатмарлы заман ысын ирҙәрҙе тыуҙыра. Улар иһә ил хәстәрен, дәүләт йөгөн үҙ иңенә аһ-зарһыҙ һала. Махсус хәрби операцияла ҡатнашҡан Салауат Йосопов – тап шундайҙарҙан.

Салауат Рәшит улы менән тыуған яғына ялға ҡайтҡанында осрашып һөйләштек.  Яу яланындағы көнкүреш шарттары, хәрби бәрелештәр, берҙәмлек көсө, гуманитар ярҙам хаҡында ихлас бәйән итте, хис-тойғоһо менән уртаҡлашты Салауат Рәшит улы.

Салауат Йосопов былтыр сентябрҙә өлөшләтә мобилизация буйынса Ватаныбыҙҙы һаҡларға киткән. Быға тиклем ул Стәрлебаш ауылындағы “Кадастр һәм күсемһеҙ милек” үҙәге директоры булып эшләгән.

– Ҡулыма повестка тотторған саҡта ниндәйҙер шикләнеү булманы. Ил ҡушҡас, ризалаштым. Башта Пенза ҡалаһында әҙерлек курсы үттек. Әрме хеҙмәтендә лә Екатеринбург ҡалаһында элемтәсе булғайным,  – тип һөйләне яугир. – Яҡташтарыбыҙҙың ярҙамын даими тоябыҙ, тылыбыҙҙың ныҡлы икәнлеге хаҡында яҡшы беләбеҙ. Ни өсөн хәрби сафта икәнлегебеҙ, өйҙә түҙемһеҙләнеп көткәндәре хаҡында хәбәрҙарбыҙ. Һис шикһеҙ, еңеү беҙҙең яҡта буласаҡ!

Ә уның өйгә ялға ғына түгел, еңеү менән оҙон-оҙаҡҡа ҡайтыуын ҡатыны  Юлиә, ҡыҙҙары Сабина һәм Диана көтә. Сабина – Стәрлебаш ауылындағы 2-се мәктәптең V класс уҡыусыһы. Диана ла ошо уҡ белем усағының III класында уҡый. Ғаилә башлығына иң ҡәҙерле кешеләре менән айырылышыу еңел түгелдер, әлбиттә.

 – Алғы һыҙыҡта тормошҡа бөтөнләй икенсе күҙлектән ҡарайһың, хатта ваҡыт та башҡа ҡанундар буйынса аға кеүек. Хәүеф-хәтәр янаған мәлдәрҙә егеттәр менән бирешмәйбеҙ.  Был ваҡытта хис-тойғо көсәйә, пуляның осоп барғанын ишетәһең, үткерерәк күрәһең, – ти Салауат Рәшит улы.

Ошондай яуҙарҙың береһендә часть командованиеһы күрһәткән батырлығы өсөн яҡташыбыҙға ҡул сәғәте бүләк иткән.

Махсус хәрби операцияла ҡатнашҡан­дарҙың барыһына ла тыуған яҡтарына имен-һау ҡайтыуын, яҡындарын һөйөн­дөрөүен теләйек.

Айһылыу НИЗАМОВА