Тыныс йоҡла, өлкән лейтенант

Бөгөн Стәрлетамаҡта десант-һөжүм итеү батальонының десант-һөжүм итеү ротаһы командиры, махсус хәрби операция бурыстарын башҡарыу барышында батырҙарса һәләк булған өлкән лейтенант Дмитрий Загребин менән хушлашыу сараһы уҙҙы.

“Хөрмәтле Ирина Владимировна, хөрмәтле Наталья Дмитриевна, Сергей, туғандары һәм яҡындары. Бөгөн ауыр йөрәк менән Стәрлетамаҡҡа йыйылып, яҡташыбыҙҙы, бөтөнләй йәш, әммә ысын офицерҙы һуңғы юлға оҙатабыҙ. Дмитрий үҙ ғүмерен Тыуған илгә хеҙмәт итеүгә арнаны, десант училищеһын тамамланы, Сүриә Ғәрәп Республикаһында һуғышты һәм, әлбиттә, уның бөтә хеҙмәттәштәре кеүек үк махсус хәрби операцияла ҡатнашты. Шундай сағыу кешеләрҙе һәм ошондай яугирҙәрҙе һуңғы юлға оҙатыу бик йәл. Ирина Владимировна, һеҙ мәрхүм ирегеҙ менән бик яҡшы кеше, ысын илһөйәр тәрбиәләгәнһегеҙ. Наталья Дмитриевна, һеҙ уға ғүмер буйына терәк булдығыҙ, бергә тормош ауырлыҡтарын кисерҙегеҙ. Улығыҙ һәм ирегеҙ тураһында онотмаҫбыҙ. Стәрлетамаҡ хакимиәтенән Дмитрий Юрьевичтың иҫтәлеген мәңгеләштереү буйынса саралар ҡабул итеүҙәрен һорайым. Тыныс йоҡла, өлкән лейтенант, ауыр тупрағың еңел булһын, Тыуған илебеҙ өсөн һәләк булған бөтә геройҙарыңа мәңгелек дан“, – тине Башҡортостан Башлығы Радий Хәбиров.

Республика етәксеһе геройҙың әсәһенә Дмитрий Загребин батырлығы һәм фиҙакәрлеге өсөн наградланған генерал Шайморатов орденын тапшырҙы.

Стәрлетамаҡ хакимиәте башлығы Рөстәм Ғәзизов ҡала халҡы үҙенең геройы хаҡында онотмаясаҡ һәм уның исеме Стәрлетамаҡтағы бөйөк кешеләрҙең йылъяҙмаһына индереләсәк тип билдәләне һәм ҡайғы уртаҡлашыу һүҙҙәрен еткерҙе.

“Бөгөн беҙ ғүмеренең аҙағына тиклем үҙ антына һәм хәрби бурысына тоғро ҡалған ысын геройҙы һәм офицерҙы һуңғы юлға оҙатабыҙ. Юғалтыу сикһеҙ, бөгөн һеҙҙең менән бергә ҡайғырабыҙ, уның тураһында хәтер йөрәктәрҙә мәңге һаҡланыр. Мәңгелек дан, һин беҙҙең өсөн герой”, – тине республика хәрби комиссары урынбаҫары, полковник Рәмил Хәйретдинов.

Хеҙмәткәрҙәре һәм хәрби иптәштәр исеменән 11-се айырым десант-һөжүм итеү бригадаһының батальон командиры, гвардия майоры Айҙар Әүхәҙиев ҡайғы уртаҡлашыу һүҙҙәрен еткерҙе.

“Был – беҙҙең өсөн ҙур юғалтыу. Дмитрий Юрьевич менән 2018 йылдан алып иңгә-иң терәп хеҙмәт иттек, хәрби бурыстарҙы үтәнек, уның тураһында уҙған ваҡытта һөйләү бик ауыр. Ысын герой, ул мәңгелеккә беҙҙең менән буласаҡ, үҙенең шәхси составы тураһында хәстәрлек күрҙе, шәп командир ине. Мәңгелек хәтер һиңә”, – тине ул.

Айҙар Әүхәҙиев геройҙың ҡатынына өлкән лейтенант үлгәндән һуң бүләкләнгән Батырлыҡ орденын тапшырҙы.

“Мин Диманы бик яҡшы белә инем, уҡыған саҡта уның менән бик тығыҙ аралаштыҡ, ул һәр саҡ бөтә сараларҙа ла беренсе ролдәрҙә булды. Ул балаларға хас булмағанса етди булды, һәр саҡ маҡсат ҡуйҙы һәм уға табан барҙы. Ул Рязань десант хәрби училищеһына уҡырға инергә хыялланды һәм үҙенең маҡсатына өлгәште. Дима Һауа-десант ғәскәрҙәре офицеры булыу маҡсатын ҡуйҙы, һәм ул ошо вазифаға тәғәйенләнде. Ул үҙ бурысын аҙағынаса үтәне. Яңы уҡыу йылында кластарҙың береһенә уның исемен бирергә һәм уның иҫтәлегенә арналған спартакиада үткәрергә ҡарар иттек. Беҙ был хәтерҙе мәңге һаҡларға вәғәҙә итәбеҙ. Тыныс йоҡла”, – тине 4-се урта мәктәп директоры урынбаҫары Игорь Саушин.

Дмитрий Юрьевич Загребин 1995 йылдың 18 февралендә Стәрлетамаҡта тыуған. 1-6 кластарҙа 28-се урта дөйөм белем биреү мәктәбендә уҡый, 2009 йылда үҙ теләге менән Рәсәй Федераль именлек хеҙмәтенең 4-се мәктәбе сик буйы органдарының профилле кадет класына күсә.

2013 йылда Рязань гвардия юғары һауа десанты училищеһына уҡырға инә. 2014 һәм 2015 йылдарҙа ҡыҙыл майҙанда Еңеү парадында ҡатнашҡан. Уҡыуҙы тамамлағандан һуң 2018 йылдан Улан-Удэла, Сосновый Бор ҡасабаһында урынлашҡан 11-се айырым гвардия десант-һөжүм итеү бригадаһында хеҙмәт итә.

Сүриә Ғәрәп Республикаһында хәрби операцияла ҡатнашҡан, унда яраланған. Батырлыҡ ордены, “Батырлыҡ өсөн”, “Һәләкәткә осраусыларҙы ҡотҡарған өсөн”, “Хәрби айырмалыҡтар өсөн”, “Хәрби берҙәмлекте нығытҡан өсөн”, “Сүриәлә хәрби операцияла ҡатнашыусы” миҙалдары менән бүләкләнгән.

2022 йылдың февраленән махсус хәрби операция үткәреү зонаһында алғы сафта була. 31 майҙа тигеҙ булмаған алышта махсус операция яһағанда һәләк була. Ғүмеренең һуңғы секундына тиклем хәрби антына тоғро ҡалған, Рәсәй Федерацияһы офицеры данын данлаған. Үлгәндән һуң икенсе Батырлыҡ ордены менән наградлана.

Фото һәм мәғлүмәт: "Башинформ".