Балама юл доғаһы

Физалия Дәүләтгәрәева шиғыры

БАЛАМА ЮЛ ДОҒАҺЫ

Юлға сыға балам. Алдарынан
Ебәр, Хоҙай, Хызыр Ильясты.
Һинән генә һорайым именлеген,
Һорайым уға изге юлдашты.

Иҫән-имен әйләнеп ҡайтыуын
Ялбарам мин Һинән, Хоҙайым.
Кисерә күр ҡылған гонаһтарҙы,
Ҡабул булһын ҡылған был доғам.

Һаҡла, зинһар, бәлә-ҡазаларҙан
Йыраҡ сәфәр ҡылған улымды.
Фәрештәләр ҡанаты ҡаплаһын
Доғаларым аша баламды.

Ҡайтып керһен өйгә шатлыҡ менән,
Әсе ҡайғыларҙа яндырма.
Һәр нимәгә етә көс-ҡөҙрәтең,
Ярҙамыңдан, зинһар, ҡалдырма.

Фото: видеонан скриншот.