Был егеттәрҙең батырлығын белергә тейешһегеҙ

Рәсәйҙең көсө – уның илһөйәр халҡында. Махсус хәрби операцияға үҙ теләге менән китеп, батырҙарса һуғышҡан яҡташтарыбыҙға ҡарап был һүҙҙәрҙең хаҡлығына тағы ла инанаһың.

Беҙҙең республиканан профессиональ армия сафында хеҙмәт иткән яугирҙәр ҙә һынатмай. Апрелдә Башҡортостанда дислокацияланған үҙәк хәрби округының инженер берләшмәһенә Жуков ордены тапшырылыуы ошо хаҡта һөйләй. Бригада Рәсәй Федерацияһы Президенты указы менән махсус хәрби операцияның хәрби бурыстарын үтәгәндә күрһәткән батырлығы һәм фиҙакәрлеге өсөн юғары наградаға лайыҡ булды.

Хәрби часть биләмәһендә Жуков орденын тапшырыу тантанаһы шәхси состав ҡатнашлығында үтте. Хәрби байраҡты байраҡ взводы индерҙе, уның баҫҡан һәр аҙымы плац өҫтөндә йәш һалдаттарҙың йөрәк тибеше менән бер булып яңғырай.

Комбриг полковник Евгений Латышев, шәхси составҡа мөрәжәғәт итеп, бригаданың күп өлөшөнөң махсус хәрби операция биләмәһендә булыуын һәм ҡуйылған хәрби бурыстарҙы уңышлы үтәүен билдәләне.

– Жуков ордены – хәҙер һуғышҡан иптәштәрегеҙҙең даны һәм намыҫы. Бригада махсус операцияның башынан уҡ хәрби бурыстарҙы уңышлы үтәй, һөҙөмтәне күрәбеҙ — Үҙәк хәрби округ алға бара һәм унда 12-се гвардия бригадаһының индергән өлөшө бар. Шуға күрә Оборона министрлығы етәкселеге бригаданы орден менән бүләкләү тураһында ҡарар ҡабул итте. Был – сафта торғандарҙың, бигерәк тә алғы һыҙыҡта булғандарҙың ҡаҙанышы. Рәхмәт, – тине Евгений Латышев.

Башҡортостан Башлығы Радий Хәбиров исеменән ҡотлау менән уның Хакимиәте Етәксеһе Максим Забелин мөрәжәғәт итте. Ул хәрбиҙәрҙең илебеҙҙең юғары баш командующийының лайыҡлы баһаһын алыуын һәм гвардиясыларҙың маҡтаулы исемен раҫлауын һыҙыҡ өҫтөнә алды.

– Һеҙ хәрби бурысығыҙҙы үтәү, фиҙакәрлек һәм профессионализм өлгөһө. Башҡортостанда үҙ ғүмерен Ватанды һаҡлауға бағышлағандарҙың иҫтәлегенә ҙур хөрмәт менән ҡарайҙар. Бөйөк Ватан һуғышынан алып данлы тарихҡа эйә булған бригаданың тарихы һәм хәҙерге ҡаҙаныштары менән ғорурланабыҙ. Фашизмға ҡаршы алыштарҙағы батырлығы һәм ҡаһарманлығы өсөн бригаданың ете яугире Советтар Союзы Геройы исеменә лайыҡ була, ә 1373 хәрби хеҙмәткәр орден һәм миҙалдар менән бүләкләнә. Бөгөн, Бөйөк Еңеүҙең 79 йыллығы алдынан, һеҙ махсус операцияла йәнә батырлыҡ һәм ҡаһарманлыҡ күрһәтәһегеҙ. Батырлығығыҙ Еңеүгә алып барһын, — тине Максим Забелин.

Жуков орденын Хәрби байраҡҡа Рәсәй Федерацияһы Ҡораллы Көстәренең инженер ғәскәрҙәре начальнигы генерал-лейтенант Юрий Ставицкий беркетте.

– Һеҙ - Жуков орденына лайыҡ булған икенсе бригада. 12-се бригада махсус хәрби операция биләмәһендә бөтә бурыстарҙы үтәй. Алғы һыҙыҡта, тылда кәртәләрҙе йыһазландырабыҙ, кисеүҙәрҙе монтажлайбыҙ, мина яландары аша үтеүҙәрҙе тәьмин итәбеҙ. Бурыстарҙың күләме ярайһы уҡ киң. Штурмлау подразделениеларының уңыштары 12-се инженер бригадаһыныҡы ла, — тине Юрий Ставицкий.

Башҡортостан Башлығы Радий Хәбиров үҙенең социаль селтәрҙәрендә Кенигсберг-Городок Ҡыҙыл Байраҡ бригадаһының 12-се айырым гвардия инженер бригадаһы хәрбиҙәрен ҡотланы. Республика етәксеһе яугирҙәрҙең үҙ бурысын профессиональ һәм фиҙакәр үтәүен билдәләне. Подразделение Рәсәй ғәскәрҙәре Донецк Халыҡ Республикаһында Авдеевканы яулап алған саҡта ҙур әһәмиәтле бурысты үтәгән.

“Бригаданың шәхси составы махсус хәрби операция барышында күрһәткән батырлығы һәм ҡаһарманлығы, сыҙамлығы һәм батырлығы өсөн дәүләт башлығының юғары баһаһын ала. Беҙҙең 12-се бригаданың Бөйөк Ватан һуғышы йылдарында башланған данлы тарихы бар. 1942 йылда ойошторолған, һәм ул әле лә илебеҙҙә инженер подразделениелары араһында иң яҡшыларҙың береһе булып ҡала. Тәүҙән үк Алкин-2 яугирҙәренә 387 дәүләт наградаһы һәм Рәсәй Оборона министрлығының 1081 наградаһы тапшырыла. Бөтә һалдаттарҙы һәм офицерҙарҙы наградалары менән ҡотлайым! Ватанды һаҡлаусыларыбыҙға мәңгелек дан!” – тип яҙҙы Радий Хәбиров.

 Олег Яровиков фотоһы. Башинформ.