Оло кеше өсөн – ҙур ярҙам

Ошо көндәрҙә Мәсетле районының Оло Ыҡтамаҡ ауылында йәшәүсе Светлана Лавроваға урындағы мәктәптең 6 “б” класы уҡыусылар килде.

Улар класс етәкселәре  Лилиә Мөхтәрова һәм технология уҡытыусыһы  Ильмир  Хәйретдинов менән берлектә  изге ниәтте тормошҡа ашырҙы – махсус хәрби операцияла ҡатнашыусының әсәһенең ихатаһын тәртипкә килтерҙе. Балалар тиҙ арала уны сүп-сарҙан һәм япраҡтарҙан таҙартты, күмәкләшеп утын өйҙө. Оло йәштәге ханым өсөн был ысын мәғәнәһендә ҙур ярҙам.

Светлана Викторовнаның  улы  Иван (позывнойы – “Фаза”) ҡәҙимге тормошта тракторсы-машинист һөнәрен үҙләштерһә, хәрби осорҙа  взвод командиры урынбаҫары булып хеҙмәт иткән.

Уны аралашыусан, музыка яратҡан, ихлас булмышлы ир-ат тип беләләр. Иван ғаилә ҡорған, ҡатыны менән ике бала үҫтергән.

Ҡыҙғанысҡа ҡаршы, уны дошман пуляһы аямаған: ошо көндәрҙә Ивандың һәләк булыуы һәм тыуған яғында ерләнеүе хаҡында мәғлүм булды.

Район хакимиәтендә яугирҙең ғаиләһенә һәм әсәһенә даими ярҙам күрһәтәсәкбеҙ, тип хәбәр иттеләр.

Фото Мәсетле районы хакимиәте төркөмөнән.