Ринат Әхмәров: МХО-ла ҡатнашыусылар өсөн ярыштар юғары кимәлдә үтә

– Мин үҙем спорт мастерлығына кандидат, тренер булып эшләйем һәм күп йылдар өҫтәл теннисы буйынса ярыштар судьяһымын, – тип һөйләне Ринат Әхмәтйән улы. – Судья сифатында профессиональ ярыштарҙа ҡатнаштым, шулай уҡ былтыр сурдолимпия уйындарында булдым. Бөгөн өҫтәл теннисы буйынса турнирҙа Рәсәйҙең һигеҙ төбәгенән 20 кеше ҡатнаша. Дүрт уйынсы Башҡортостан исеменән сығыш яһай. Бер үк ваҡытта дүрт өҫтәлдә уйнайҙар. Дөйөм алғанда иһә ҡағиҙәләр профессиональ спорт ҡағиҙәләренән айырылмай. Ни бары, беҙ сәләмәтлек мөмкинлектәре сикләнгән спортсыларға лояль ҡараштабыҙ, сөнки был егеттәр фронттан килгән.

“Беҙҙең заман геройҙары” ярыштары юғары кимәлдә ойошторолған, ҡорамалдар – Башҡортостанда иң яҡшыларҙың береһе, көслө судьялар корпусы эшләй, тип билдәләне Ринат Әхмәров.

Рәсәй Паралимпия комитеты президенты Павел Рожков билдәләүенсә, Башҡортостанда башҡа төбәктәрҙән белгестәр йәлеп итмәйенсә лә һаулыҡ мөмкинлектәре сикләнгән кешеләр өсөн турнир ойоштороу мөмкинлеге бар.