«Тыуған илемә хеҙмәт итәм»,– ти яугирҙәр

Тантаналы сарала ветерандарҙың йәмәғәт ойошмалары етәкселәре, социаль координаторҙар ҡатнашты, яугирҙең туғандары һәм яҡындары ла килгәйне.

Фонд филиалы етәксеһе Гөлнур Ҡолһарина яугирҙәрҙе күптән көтөлгән документты алыуҙары һәм яңы статусҡа эйә булыуҙары менән ҡотланы.

– Алғы һыҙыҡта һеҙ уртаҡ еңеүҙе яҡынайтып, батырлыҡ һәм ҡаһарманлыҡ күрһәттегеҙ, шуның өсөн һеҙгә сикһеҙ рәхмәтлебеҙ. Һеҙҙе фондтың филиалында күреүебеҙгә һәр ваҡыт шатбыҙ. Белгестәребеҙ консультациялар үткәрергә һәм һәр яҡлап ярҙам күрһәтергә әҙер. Ветеран статусы – ул статус ҡына түгел, ә йәмғиәт, һеҙҙең яҡындарығыҙ алдында яуаплылыҡ та. Һеҙҙе йәмәғәт эшмәкәрлеге менән шөғөлләнгән, киләсәк быуынды тәрбиәләүгә үҙ өлөшөн индерергә ынтылған ветерандар сафында көтәбеҙ, – тип билдәләне Гөлнур Ғәлинур ҡыҙы.

Ветерандар документтар тултырыуҙа ярҙам иткән филиал хеҙмәткәрҙәренә һөнәри оҫталыҡтары өсөн рәхмәт белдерҙе.

– Мин наградаға сикһеҙ шатмын һәм үҙ халҡым мәнфәғәте өсөн эшләп, ышанысты аҡларға ниәтләйем, – тине ветеран Виталий Матвеев.

Игорь Сидорчук менән Сергей Фәритов таныҡлыҡтарҙы алыу менән йәнә алғы һыҙыҡҡа барырға йыйына.

– Дошман еңелмәгән әле. Беҙ Тыуған илде һаҡларға һәм яуҙаштарға ярҙам итергә бурыслы. Беҙ еңәсәкбеҙ! –  тине улар.

Фото:  "Ватанды һаҡлаусылар" фонды филиалының социаль селтәрҙәге рәсми төркөмөнән.