Киләһе осрашҡанға тиклем хушлаштылар

Йөҙгә яҡын мобилизацияланған яугир 1 апрелдә махсус хәрби операция биләмәһенә тантаналы рәүештә оҙатылды. Ике аҙналыҡ хаҡлы ялдан һуң улар хәрби бурыстарҙы үтәү өсөн хәрби частарына юлланды.

Хәрби хеҙмәткәрҙәр һәм уларҙы алыҫ юлға оҙатыусы туғандары һәм яҡындары, дуҫтары һәм хеҙмәттәштәре ғәҙәттәгесә “Өфө-Арена” спорт комплексы алдындағы майҙанға йыйылды. Бынан яугирҙәрҙе махсус хәрби операция биләмәһенә “Башавтотранс” предприятиеһының ике уңайлы автобусы алып барасаҡ.

– Беҙгә ике мең саҡрым самаһы үтергә, иртәгә кискә табан барып етәбеҙ, – ти яугирҙәр.

Башҡортостандан мобилизацияланғандарҙың күпселеге кеүек үк, Шишмә районынан “Ежик” позывнойлы хәрби өсөн был бишенсе ҡыҫҡа ваҡытлы ял булған. Тыныс тормошта ул төҙөүсе булып эшләгән.

– Шишмәнән яҡташтарымдың барыһы ла тиерлек минең менән бер взводта хеҙмәт итә, – тип һөйләй яугир, ҡыҙын ҡосағынан ысҡындырмайынса. – Бөгөн яугирҙәрҙең үтенесе буйынса ғаиләләренә тапшырылған күп шәхси әйберҙәрҙе үҙем менән алып барам. Шулай итеп, бөтә кәрәкле әйберҙәрҙе беҙгә гуманитар конвойҙар килтерә. Бигерәк тә блиндаж өсөн төҙөлөш материалдары кәрәк була.

“Ежик” кәйефенең көйлө булыуын, уны хәрби иптәштәре көтөүен белдерҙе. Шул уҡ ваҡытта яугирҙәрҙе сафҡа теҙеп, уларҙы урындағы власть һәм хәрби комиссариат вәкилдәре сәләмләне.

– Бөгөн һеҙҙең ғаиләләрегеҙ, бөтә республика, бөтә ил һеҙҙең менән ғорурлана. Һеҙ барыбыҙ өсөн дә ысын батырлыҡ һәм патриотизм өлгөһө булып тораһығыҙ, — тип мөрәжәғәт итте хәрби хеҙмәткәрҙәргә республиканың хәрби комиссариатының баш белгес-эксперты, подполковник Дмитрий Смирнов. – Белегеҙ, һеҙ хеҙмәт иткән арала республика ғаиләләрегеҙ, туғандарығыҙ һәм яҡындарығыҙ хаҡында хәстәрлек күрәсәк. Яугирҙәргә даими рәүештә бөтә кәрәкле әйберҙәр ебәрелә, гуманитар ярҙам күрһәтелә, социаль-көнкүреш мәсьәләләре оператив хәл ителә.

Был тәү сираттағы бурыс булды һәм шулай ҡала, тип билдәләне комиссариат вәкиле.

– Һеҙ иңгә-иң терәшеп, лайыҡлы хеҙмәт итәһегеҙ. Ватанды һаҡлау буйынса бурысығыҙҙы намыҫ менән үтәйәсәгегеҙгә ышанам. Һеҙ ысын геройҙар. Легендар генерал Миңлеғәле Шайморатов әйтеүенсә, Салауаттың вариҫтары сигенә белмәй. Беҙҙең эшебеҙ изге, еңеү беҙҙең ҡулда буласаҡ! Һеҙҙең төп бурысығыҙ — иҫән-һау ҡайтыу, – тип билдәләне подполковник.

Артабан хәрбиҙәр туғандары менән ҡосаҡлашып, улар менән киләһе осрашҡанға тиклем хушлашты.

Автобустар майҙандан “Славянканың хушлашыуы” йыры аҫтында ҡуҙғалып китте.

Имен йөрөгөҙ, Ватан һаҡсылары!

Фото: Ринат Рәжәпов.