Беҙҙең ике ветеран финалға сыҡты

Махсус хәрби операцияла ҡатнашыусылар араһында һөнәри оҫталыҡ буйынса "Абилимпикс" беренсе чемпионаты финалына Башҡортостандан ике ветеран сыҡҡан: Артем Мөхәрәмов һәм Дмитрий Полубояринов.

Артем Мөхәрәмов "ЧПУ менән станокта токарь эше" компетенцияһында эшен күрһәткән, ә Дмитрий Полубояринов "Ашнаҡсы эше" компетенцияһында көс һынашҡан. Ил һаҡсыларының икеһе лә махсус хәрби операцияһы башланыу менән алғы һыҙыҡҡа юлланған, икеһе лә төрлө орден һәм миҙалдар менән наградланған.

– "Ватанды һаҡлаусылар" фондының төбәк ойошмаһына рәхмәтем сикһеҙ, беҙгә шундай ҙур мөмкинлектәр бирҙе, яуҙаштарым менән бындай конкурста ҡатнашыуыма шатланам, – тип һөйләй Артем Мөхәрәмов.

Дмитрий Полубояринов әйтеүенсә, чемпионат юғары кимәлдә ойоштороған, үҙеңде бөтөнләй бүтән яҡтан асыу өсөн ныҡ отошло.

Яҡташтарыбыҙ октябрҙә чемпионаттың финалында Башҡортостандың данын яҡлаясаҡ.

Фото: "Башинформ".