“Беҙҙең күстәнәс бик үтемле ул”

Ҡариҙел районының Нәһретдин ауылы хужабикәләре махсус хәрби операцияла ҡатнашыусы яугирҙәр өсөн тәмле лә, файҙалы ла күстәнәс әҙерләү өсөн йыйылды. Улар бөгөн бөтә күңел йылыһын һалып, кәбеҫтә тоҙланы.

“Тоҙланған кәбеҫтә – С витамины хазинаһы, сәләмәтлекте һаҡлау һәм иммун системаһын нығытыуҙа ҙур роль уйнай”, ти хужабикәләр. Был аҙыҡтың йөҙ грамында 20 миллиграмдан 50 миллиграмға тиклем аскорбин кислотаһы бар. Ә тоҙланмаған кәбеҫтәлә ул ике-биш тапҡырға кәм.

Ирекмәндәр өй шарттарында әҙерләнгән кәбеҫтә яугирҙәргә оҡшар, аҙ булһа ла туҡланыу рационын төрләндерергә ярҙам итер, тыуған яҡты һәм йылы йорттарын иҫкә төшөрөр, тип уйлай.  Нәһретдин ҡатын-ҡыҙҙары, тәмле күстәнәстәрен иң изге теләктәр теләп, Ватан һаҡсыларына оҙатты. Егеттәрҙең иҫән-һау, еңеү менән әйләнеп ҡайтыуҙарын улар сабырлыҡ  менән көтә.

Фото:”Ҡариҙел” гәзите.

Беҙҙең МАХ каналына https://max.ru/gazetabashkortostan ҡушылығыҙ!