Артур Хәсәнов сирле балаға ярҙам иткән

Башҡортостандан өлөшләтә  мобилизацияға эләккән артист Артур Хәсәнов киҫкен лимфобластлы лейкоз менән яфаланған Теона Образенконы дауалауға 30 мең һум аҡса күсергән.

«Хәсән» позывнойлы яугир хәбәр итеүенсә, Өфөлә йәшәүсе биш йәшлек Теоноға ҡурҡыныс диагнозды былтыр декабрҙә ҡуйғандар. Әле ҡыҙҙы дауалауға 10 миллион һумдан ашыу аҡса йыйылған, тағы ла 5 миллион һум аҡса талап ителә.

Артур Хәсәнов 2022 йылдан махсус операцияла ҡатнаша. Хәрби хеҙмәткә тиклем ул Дүртөйлө районындағы мәҙәни-ял итеү үҙәгендә эшләгән. «Хәсән»дең исеме республикабыҙ халҡына яҡшы таныш. Артурҙың Филүс Ҡаһиров репертуарынан «Кейек ҡаҙ юлдары» йырын башҡарған видеояҙмаһы ҡыҫҡа ваҡытта социаль селтәрҙәрҙә таралып, уға көтөлмәгән популярлыҡ килтерҙе.

2024 йылда Артур Хәсәнов МХО зонаһындағы хәрби хеҙмәте өсөн IV дәрәжә Георгий кресы менән бүләкләнгән.

Сығанаҡ: "Башинформ"

Беҙҙең МАХ каналына max.ru/gazetabash... ҡушылығыҙ!