Яугирҙәрҙең һорауы үтәлде

Яңыраҡ Салауат ҡалаһынан махсус хәрби операция зонаһына гуманитар ылау ойошторолдо. Уны туплауҙа ирекмәндәр, предприятие хеҙмәткәрҙәре, эшҡыуарҙар ҡатнашты. Ҡыҫҡа ғына ваҡыт эсендә яугирҙәр һораған техника, ҡорамалдар һәм башҡа кәрәк-яраҡ тупланды. Яугирҙәргә транспорт, элемтә саралары, инструменттар, төҙөлөш материалдары,  дарыу препараттары, шулай уҡ йылы кейем-һалым, аҙыҡ-түлек, адреслы посылкалар алып барылды.

– Барыбыҙҙың тырышлығы менән еңеүҙе яҡынайта аласаҡбыҙ, – ти Салауат ҡала хакимиәте башлығы Марат Заһиҙуллин. – Яугирҙәр кәрәкле әйберҙәр алыу менән бергә үҙҙәре тураһында хәстәрлекте, ышанысты тоя.

Яугирҙәргә гуманитар йөктө илтеүҙә ҡала хакимиәте башлығының беренсе  урынбаҫары Семен Евграфов, ҡала хакимиәте башлығы урынбаҫары – ҡала хужалығы идараһы начальнигы Илдар Әхмәтвәлиев, “Синдикат” гуманитар конвойҙың мобиль төркөмө етәксеһе  Александр Бабаян ҡатнашты.

– Беҙ яҡташтарыбыҙҙың батырлығы, ҡыйыулығы менән сикһеҙ ғорурланабыҙ, – тип билдәләне ҡала хакимиәте  башлығы. – Яугирҙәр тылдағыларға ҡайнар сәләмдәрен ебәрә, бындай ҙур ярҙам һәм тәрән ышаныс менән еңергә була, ти улар. Гуманитар ылау туплауҙа ҡатнашҡан һәр кемгә рәхмәт!

 Фото: “Выбор” гәзите.