“Резина итекте күптән оноттоҡ…”

Был көләс йөҙлө, тыныс, күркәм холоҡло ханымдың “Көйөргәҙе килене” булып китеүенә лә хәтһеҙ ваҡыт үтеп киткән. Ул – 36 йыл һауынсы булып эшләгән “Искра” ауыл хужалығы кооперативында күптән инде үҙ кеше.

Ә бит йәшлек хыялдары башҡаса ине. Ғафури районының Юрмаш ауылында тыуып үҫкән Мине­бикә Ишембай ҡалаһы училищеһында тегенсе һөнәрен үҙләштерә. Бөтә эште, әхирәтенең һүҙен йыҡ­май, Көйөргәҙе райо­нының Ҡотлоюл ауылына ҡунаҡҡа барыу ваҡи­ғаһы “боҙа”. Егеттәр ят ҡу­наҡ ҡыҙҙы күҙләмәй буламы? Зөфәр тигәне айы­рыуса етеҙ, иғти­бар­лы булып сыға. Күп тә үтмәй, йәш­тәр бергәләп татыу тормош ҡора, Илмир исемле улдары, Нәзифә исемле ҡыҙҙары донъяға килә.

– Тәүҙәрәк һыйыр һа­уыу эшенән бер аҙ ҡурҡа инем. Ауыр физик эш. Ре­зина итек йәйен дә, ҡы­шын да аяҡтан төш­мәне, көн дә өшөп-туңып йө­рөй­һөң. Кеше ыңға­йы­на эш­ләргә тырышып, һауырға ла өйрәндем, – тип йылмая Минебикә Аҡсарова. – Бер һауын­сыға 25 баш һыйырҙы һауыу йөкмә­телгәйне.

Эшһөйәр ҡатын кеше­ләргә һәйбәт мөнәсәбәте, аралашыусан, алсаҡ йөҙ­лө булыуы менән коллективта хөрмәт ҡаҙана. Ал­дынғы һауынсы “Искра” ауыл хужалығы етеш­тереү кооперативы, район хакимиәтенең Почет грамоталарына ла­йыҡ була.

Минебикә Сәйфулла ҡыҙының һөнәре хәҙер башҡаса яңғырай – машина менән һауыу операторы. Ике йөҙҙән ашыу һауын һыйырын ни бары биш кеше хеҙмәт­ләндерә.

– Эшебеҙ еңел хәҙер, – ти ул. – Элек һыйырҙарҙы йыуып ыҙалай инек, хәҙер һәүкәштәребеҙ таҙа, үҙҙәре тыңлаусан. Һауын залына 16 һыйырҙы бер юлы инде­рәбеҙ ҙә өсәүләп автомат менән һауабыҙ. Уларҙы сығарып ебәргәс, йәнә яңыларын индерәбеҙ.

Малҡайҙар эш ритмына күнеккән инде, автоматтың көйлә­үенә лә иғтибар итмәй, үҙ сиратын көтөп тыныс ҡына көйшәп тора. Элек уларҙың һәр береһенә ҡушаматтары менән “Ромашка”, “Аҡбаш” тип өндәшһәк, хәҙер һәр береһенең шәхсән һаны бар.

Малды ашатыу-эсереү ҙә автомат­лаш­тырылған. Эш шарттары яҡшы булғас, һауынсыларға ла, малсыларға ла ҡытлыҡ юҡ. Йәштәр ҙә эштән баш тартмай.

– Резина итек кейеүҙе күптән оноттоҡ, – ти алдынғы һауынсы. – Ябай хеҙмәт кешеләренә ҙур иғтибар тойҙоҡ. “Искра” ауыл хужалығы етештереү кооперативы рәйесе Рәмил Мостафинға, Көйөргәҙе районы хакимиәте белгестәренә рәхмәттән башҡа ни әйтә­һең? Хәҙер ни, силос һалаһы юҡ, йыуаһы юҡ, һыйырҙарҙы бәйләп йонсойһо юҡ.

Үҙенең районын заманында дан-шөһрәткә күмгән яҡташтары, Социалистик Хеҙмәт Геройы Шәүәли Вахитовтың юлын дауам итеүселәр етерлек Көйөргәҙе ерен­дә. Район хакимиәте башлығы ҡарарына ярашлы, 2002 йылда Шәүәли Вахитов исе­мендәге премия булдырыл­ғандан һуң машина менән һауыу операторҙары ара­һында киң ярыш йәйелдерелде. Былтырғы эш һөҙөмтәләре буйынса 17-се тапҡыр тапшырылған премияға “Искра” ауыл хужалығы етештереү кооперативы һауын­сыһы Минебикә Аҡсарова лайыҡ булды.

– Хеҙмәтемде лайыҡлы баһалаған, кәрәк саҡта ярҙамға килгән, кәңәш иткән коллективыма, бригадир Ғәҙелхай һәм ферма мөдире Иҙрис Боҫҡановтарға рәх­мәтемде белдергем килә, – ти Минебикә Сәйфулла ҡыҙы. – Былай ҙурлағас, артабан да эшләрмен тип торам.

Көйөргәҙе районы