Шишмәлә ер эшсәндәренә хөрмәт ҙур.
Ҡара бәрхәт кеүек баҫыуҙарҙы йәм-йәшел ужым сәсеүлектәре алмаштыра. Бер яланда дым ҡаплатһалар, икенсеһендә сәсеү эштәре ҡыҙа. Киң болондарҙы иңләгән тракторҙар йырынан тирә-яҡҡа йәм тарала, күңелдә әйтеп аңлата алмаҫлыҡ шатлыҡлы хистәр уяна. Ана шундай хеҙмәт сәме, дәрт менән ҡыр эштәрен башлаған шишмәләр.
“Үҙәк” МТС-ының “Нива” Ҡырмыҫҡалы филиалына ҡараған Шишмә бүлексәһендә лә сәсеү ҡыҙа. Сәсеүлектәр 5747 гектар майҙанды биләй. Шуның 1376 гектарын – иген, 1263 гектарын – техник культуралар, 768 гектарын бер йыллыҡ үлән тәшкил итәсәк.
– Техника, орлоҡ, яғыулыҡ-майлау материалдары та етерлек, – ти бүлексә етәксеһе Илгиз Рәдиф улы Ишмаев. – Күптән түгел генә “Амазоне” тигән яңы сәскес алдыҡ. Әле төндә ҡырау төшөүе, ерҙең еүеш булыуы бер аҙ тотҡарлай.
Ҡыр эштәрен тиҙ арала ойошҡанлыҡ менән тамамлау өсөн бында бергәләп тотонғандар. Мөршиҙә Малькова, Әлиә Ғәзетдинова, Рим Исламғолов орлоҡ ағыулауҙа уңғанлыҡ күрһәтә. Сәсеү ике сменала ойошторолған. Анатолий Кабеков, Рәмил Тайыпов кеүек механизаторҙарҙы маҡтап телгә алды етәксе..
– Тракторсылар етешәме? – тип ҡыҙыҡһынабыҙ Илгиз Рәдиф улынан.
– Электән тир түккән тәжрибәле механизаторҙарға таянабыҙ, сөнки бөгөнгө техникаға кисә генә уҡыу йорто тамамлап килгән йәш белгесте ултыртыу мөмкин түгел. Әлбиттә, алмаш та кәрәк. Үкенескә ҡаршы, бөгөн ер эшенә атлығып торған йәштәр юҡ тиерлек. Ә инде теләге булғандарҙы өлкәндәргә беркетәбеҙ, улар тәжрибәһе менән уртаҡлаша.
Киләсәген ауыл хужалығы, техника менән бәйләргә ниәтләгән егеттәрҙе лә күреп ҡыуандыҡ. Мәҫәлән, Азат Хәсәнов Ҡырмыҫҡалы районының Ҡустығол ауылынан килеп, әле “МТЗ” - 82 тракторын йүнәтә.
Бәләкәйҙән механизатор булып эшләгән атаһына ярҙамлашып йөрөгән егет техниканы яҡшы белә. Райондағы училищела уҡып, белем алған, комбайнсыға ла уҡырға теләге барлығын белдерҙе.
– Ауылда ла бына тигән итеп йәшәргә мөмкин, ҡулыңда һөнәрең генә булһын, – ти алсаҡ егет.
Бүлексәнең алдынғы тракторсыһы Рәфис Байковты Сыуалкип баҫыуында тап иттек. Ҡеүәтле “Джон дир” тракторында борсаҡ сәсеп йөрөй ине ул.
– Беҙҙең Рәфис йырҙа йырланғанса, яҙын тракторҙа эшләһә, ашлыҡ йыйғанда комбайнға ултыра. Уңған, булдыҡлы егеттәребеҙҙең береһе, – тине уның хаҡында Илгиз Рәдиф улы.
Егеттән күпме хеҙмәт хаҡы алыуы менән ҡыҙыҡһынабыҙ.
– Эш күләменә ҡарап, – Рәфис ихлас йылмайҙы. – Сәсеү ваҡытында 30 – 35 мең һум самаһы сыға.
Бүлексәлә ситтән килгәндәр өсөн бөтә уңайлыҡтар булған дөйөм ятаҡ бар. Унда һыуытҡыс, телевизор ҡуйылған.
...Эңер яҡынлашты. Берәүҙәр көндөҙгө сменанан ҡайтһа, икенселәре уларҙы алмаштыра. Яҙҙың һәр сәғәте ҡәҙерле – шуны файҙаланып ҡалырға тырыша уңғандар. Көнө буйы ҡояш аҫтында ҡара янған баҫыу хужаларын Фәйлә Богданова, Емеш Хәбибуллина тәмле аш-һыу әҙерләп көтөп тора. Егеттәр тамаҡ ялғап алғас, боҫрап торған мунсаға юлланды. Тир түгеп икмәк үҫтергән уңғандарҙы ҡәҙерләй ҙә, хөрмәт итә лә беләләр Шишмәлә.