Бөтә яңылыҡтар
Иҡтисад
26 Апрель 2019, 12:12

Яңы эш урындары вәғәҙә итәләр

Быйыл Ишембай районында хаҡы 1,2 миллиард һум булған киң күләмле инвестиция проектын тормошҡа ашыра башлау планлаштырылған. Уның уңышлы үтәлеше районға 50 өҫтәмә эш урыны бирәсәк.

Быйыл Ишембай районында хаҡы 1,2 миллиард һум булған киң күләмле инвестиция проектын тормошҡа ашыра башлау планлаштырылған. Уның уңышлы үтәлеше районға 50 өҫтәмә эш урыны бирәсәк.


– Был проектты ғәмәлгә ашырыу 2019–2025 йылдарға иҫәпләнгән, һәм уны башҡарыуҙы “Экология 21” ғилми-етештереү предприятиеһы үҙ өҫтөнә алды, – тине Ишембай район хакимиәтенең Иҡтисади үҫеш, сәнә­ғәт, эшҡыуарлыҡ һәм хеҙмәт­лән­дереү мәсьәләләре буйынса идаралығы етәксеһе Юрий Дегтярев “Эшҡыуарлыҡ сәғәте” кәңәшмәһе барышында. – Инвестор беҙҙең районда сәнәғәт ҡалдыҡтарын эш­кәртә башларға тәҡдим итә, шул иҫәптән нефть ҡалдыҡтарын эшкәр­теү һәм утилләштереүҙе, нефть бысратҡан тупраҡты таҙартыуҙы, ошо биләмәләрҙе рекульти­вация­лауҙы ла күҙ уңында тота.


Ишембай районында ҡасандыр нефть эшкәртеү заводы булған. Ул үҙ эшен 1941 йылда уҡ башлаған, ә продукцияһы фронтҡа оҙатылып торған. Ул замандарҙа экологик хәүефһеҙлек сараларын артыҡ күҙәтмәгәндәр, бөгөнгөләй ҡаты талаптар ҙа ҡуйылмаған, шуға күрә районда нефть шламы бысратҡан урындар байтаҡ. Заманса технологиялар был проблеманы хәл итеү өсөн шарттар тыуҙырасаҡ.


Проект ике етештереү майҙан­сығын булдырыуҙы күҙ уңында тота. Икенсе майҙансыҡты Ишембай ра­йо­нында асыласаҡ айырым иҡти­сади зона биләмәһендә урынлаш­тырырға уйлайҙар. “Был әле инвес­тор менән тәүге осрашыу ғына. Беҙҙе уның нин­дәй саралар күрә­сәге, уларҙы нисек тормошҡа ашы­расағы ҡыҙыҡ­һындырҙы, инвестор беҙгә ошо йәһәттән тулы мәғлүмәт бирҙе”, – ти Юрий Дегтярев. Осрашыу һөҙөм­тәһендә “Экология 21” яуаплылығы сикләнгән ширҡәте менән инвестиция килешеүе тө­ҙөлгән.


Ишембай районына ҡағылышлы һәм “Эшҡыуарлыҡ сәғәте”ндә ҡаралған икенсе проект йыһаз етештереүҙе арттырыуҙы маҡсат итеп ҡуя. Урындағы эшҡыуар муниципалитетҡа үҙенең етештереү ҡеүәттәрен киңәйтеү өсөн ҡала сиктәрендә ер майҙаны бүлеп биреүҙе һорап мөрәжәғәт иткән.


Район хакимиәтенән хәбәр итеү­ҙәренсә, был шәхси эшҡыуар “Юрматы” йомшаҡ йыһазын етештереү һәм һатыу менән шөғөлләнә икән. Уның етештереү цехы, келәттәре, тауарҙы һатыу өсөн сауҙа май­ҙансығы бар. Эшҡыуар әйтеүенсә, бизнесты киңәйтеү, төрләндереү һәм сауҙа әйләнешен ҙурайтыу талап ителә. Проектты биш йыл эсендә тормошҡа ашырыу ҡарала, инвестиция күләме 20 миллион һум тәшкил итергә тейеш, шулай уҡ 30-45 яңы эш урынын булдырыу күҙ уңында тотола.


“Эшҡыуарлыҡ сәғәте”ндә был проектты тикшергәндән һуң йүнсел­гә ер майҙанын һайлап алыуҙа, артабан уны етештереүҙе киңәйтеү өсөн бирергә ҡарар ителгән.