Таҙалыҡ донъяһы – бәхет донъяһы

Бөйөк Ватан һуғышы башланғас, күп кенә предприятиелар, завод-фабрикалар Башҡортостанға күсерелә, шулай уҡ яңылары ла барлыҡҡа килә. Нәҡ шул осорҙа, 1943 йылдың сентябрендә, баш ҡалала “Өфөхимчистка” предприятиеһына ла нигеҙ һалына. Унда Америка Ҡушма Штаттарында етештерелгән, бензин яғыулығында эшләгән “Гофман” маркалы ике химик таҙартыу машинаһын ҡуйып, ете кеше танк ғәскәрҙәренең форма кейемен таҙарта.

Һуғыштан һуң цех ябыла, уның урынына артель асыла. Объекттың социаль мөһим­леген иҫәпкә алып, власть органдары уны ҡурсауға ала, шулай итеп, химик таҙартыу хеҙ­мәте әүҙемләшеп, предприятие күп функциялы компанияға әйләнә. Хәҙер уны Өфө халҡы ғына түгел, ә Рәсәйҙең башҡа ҡалаларында ла беләләр.

Бөгөн “Өфөхимчистка” йәм­ғиә­те республика һәм ил кимә­лендә иң ҡеүәтле ойошма­лар­ҙың береһе һанала. Тото­роҡ­ло һәм йылдам үҫешә, ҡулла­ныу­сыларҙың ихтыяжын ышаныслы атҡара. Предприятиела үҙ бурысын яҡшы белгән һәм химик таҙартыу, буяу, йыуыу хеҙмәте тармағында бай тәжри­бә туплаған берҙәм коллектив эшләй. Фиҙакәр хеҙмәте өсөн 18 кеше Хөкүмәт наградалары – орден һәм миҙалдар менән бүләкләнгән, 27 кешегә – “Көнкү­реш хеҙмәте күрһәтеү отличнигы”, дүрт кешегә “РСФСР-ҙың атҡаҙанған көнкүреш хеҙ­мәте күрһәтеү хеҙмәткәре” тигән маҡтаулы исемдәр тапшы­рылған.

Предприятиеның ҡабул итеү пункттары, салондары һәм оҫта­ханалары селтәре миллионлы баш ҡалабыҙҙы хеҙмәтлән­дереүгә өлгәшә. Алдынғы технологиялар һәм юғары квалификациялы персонал химик таҙартыу һәм кейем буяу, кер йыуыу, мамыҡ һәм келәм әйбер­ҙәрҙе таҙартыу, төрлө изде­лие­ларҙы дезинфекциялау, кейем тегеү һәм ремонтлау буйынса 87 төрҙән ашыу хеҙмәт күрһәтә.

“Өфөхимчистка” йәмғиәтенә юғары категориялы ике кер йыуғыс, химчистка һәм буяу цехы, мамыҡ һәм келәм кеүек әйберҙәрҙе таҙартыу участкалары, ҡорамалдарҙы ремонтлау, монтажлау һәм көйләү буйынса электр-механик цех ҡа­рай. Предприятиеның етеш­тереү цехтары заманса ҡора­малдар менән йыһазланды­рылған. Улар әйберҙәрҙе сифатлы таҙартыу, йыуыу һәм эшкәртеү мөмкин­леген бирә. Химик таҙартыу һәм йыуыу ваҡытында экологик яҡтан зыяны булмаған яңы быуын көнкүреш химияһы файҙа­ланыла. Улар әйберҙәрҙе йом­шаҡ, таҙа итә, бәләкәй бала­ларға һәм йорт хайуандарына хәүеф тыуҙырмай.

Башҡортостандың мәғариф тармағында контроль һәм күҙә­теү буйынса идаралығы биргән лицензия нигеҙендә “Өфөхим­чистка” предприятиеһы филиалдарында белгестәр әҙерләү һәм һөнәри оҫталыҡтарын арттырыу буйынса эш алып барыла. Рәсәйҙең төрлө төбәктә­ре­нән килеп белем алалар. Йәм­ғиәттең был эшмәкәрлеге үҙҙә­ре­нең дә эшселәренең оҫта­лыҡ­тарын камиллаштырыуға, квалификацияһын күтәреүгә, заказдарҙы ҡыҫҡа ваҡытта әҙерләүгә һәм хеҙмәтләндереү кимәлен тотороҡло итеүгә булышлыҡ итә.

“Өфөхимчистка”ның белгес­тәре халыҡты хеҙмәтләндереү өлкәһендәге заманса инновация асыштарҙы күҙәтеп бара һәм уларҙы производствола киң файҙалана. Мәҫәлән, озон газы менән таҙартыу технологияһы ҡулланған берҙән-бер предприятие булып тора. Был үҙен­сәлекле технология бөтә еҫтәр­ҙе бөтөрә, билдәле микро­орга­низмдарҙы, вирустарҙы, бакте­рияларҙы, бәшмәктәрҙе һәм уларҙың күҙәнәктәрен юҡ итә, һыу тейҙерергә ярамаған изде­лиеларҙы органик иреткестәр ярҙамында таҙарта.

Йәмғиәттең тағы бер ҡаҙа­нышы – Рәсәй Дәүләт стандарттарында аккреди­тацияланған һынау лабораторияһы. Унда химик таҙартыу, буяу, йыуыу һәм тире-тун әйберҙәрҙең сифатын тикшереү буйынса һынауҙар һәм экспертизалар уҙғарыла.

“Өфөхимчистка” йәмғиәте Рәсәй һәм Европа химчистка һәм кер йыуыу предприятиелары ассоциацияһы ағзаһы. Ул ошо өлкәлә яңылыҡ индергәне өсөн халыҡ-ара кимәлдәге ете наградаға лайыҡ булған, шулай уҡ “Рәсәйҙең 100 иң яҡшы тауары һәм хеҙмәте” конкурсында – ике, “Башҡортостандың 100 иң яҡшы тауары һәм хеҙмәте” конкурсында өс тапҡыр юғары баһа алған.

Таҙалыҡ донъяһы – бәхет донъяһы, тиҙәр. “Өфөхим­чист­ка” предприятиеһы иһә һикһән йылға яҡын ошо бәхетте өләшә.