Башҡортостанда, Мәсетлелә эшләнгән...

Мәсетле районы халҡына был тәңгәлдә айырыуса рәхәт, уңайлы, сөнки Әбдрәхим ауылындағы “Башкирский привоз” фирмаһы етештергән билмәндәрҙең теләгәнен һайларға була: “Сабантуй”, “Холостяцкие”, “Сибирский премиум”, “Изысканные”, “Русские”, “Гөлназ”. Был бренд аҫтындағы билмәндәр өйҙәге кеүек тәмле, ҡулдан эшләнгән, бер ниндәй өҫтәмәләрһеҙ һәм ҡушылмаларһыҙ. Бары тик фермер хужалығында үҫтерелгән яҡшы ит, тәбиғи тәмләткестәр һәм сифатлы он ғына ҡулланыла.

Тауары өсөн етәксе Илгиз Зиннә­туллин үҙе яуап бирергә әҙер. Уның бел­дереүенсә, сифат етештереү проце­сының башынан аҙағына тиклем тикшерелеп, көйләнеп тора.

Итле ярымфабрикаттар етештереү өсөн бында башлыса һыйыр ите ҡулланыла. Сеймал Әбдрәхим ауылын­дағы яңы заманса ҡорамалдар менән йыһазландырылған ит эшкәртеү һәм ярымфабрикаттар эшләү цехына кил­терелә. Унда барлыҡ санитария нормалары үтәлә, сит кешеләргә, медицина тикшереүе үтмәгәндәргә инеү тыйыла. Бина эсендә өс ҙур һыуытыу ка­мераһы йәнәш урынлаштырылған: кинәт туңдырыу, әҙер һәм сей продукцияны һаҡлау камералары.

Сығарылған аҙыҡ төрлөлөгө ҙур. “Баш­кирский привоз” сауҙа маркаһы аҫтында манты, билмән, хинкали, кәтлиттәр, голубцы, шашлыҡ, кәкре, кол­баса һәм ыҫланған ит әҙерләнә. Бил­мән ҡулдан эшләнә, фарш тик юғары сифатлы, экологик яҡтан таҙа иттән әҙерләнә, ҡушылмалар бөтөнләй ҡулланылмай. Әйткәндәй, продукцияны башлыса республика райондарынан һәм Татарстандан һатып алалар.

Фермерҙың “Башкирский привоз” бренды аҫтында һатыу иткән үҙ магазиндары Свердловск өлкәһенең Новоуральск, Первоуральск, Екатеринбург ҡалаларында бар. Халыҡ сифатлы һәм тәмле ит аҙыҡтарын бик теләп һатып ала. Бынан тыш, фермерҙың район ауыл­дарында ла магазиндары уңышлы эшләй.

– Шөкөр, беҙ етештергән ризыҡты халыҡ яратып һатып ала. Тирә-яҡтан заказдар йыш килә. Бөгөн тәмһеҙ, сифатһыҙ продукция етештерһәк, иртәгә ҡулланыусыларыбыҙҙы юғалты­уыбыҙ ихтимал, шуға ла сифатына һәр саҡ иғтибар итәбеҙ, – ти Илгиздең әсәһе Гүзәлиә Зиннәтуллина.

Илгиз Искәнйәр улы бөгөн 65 гектар ерҙе эшкәртә, күпләп һыйыр малы, 100-ҙән ашыу кәзә-һарыҡ аҫрай. Хужалыҡтың техника паркы бай: “ГАЗель”-термофургон һәм “ГАЗель”-рефрижератор автомобилдәре, тракторҙар, “ЗИЛ-130” йөк машинаһы, культиватор, тырматҡыс, сәскес, һабан, каток кеүек ауыл хужалығы ҡорамалдарына эйә.

2013 йылда йәш фермер “Мәсетле районында бәләкәй һәм урта эш­ҡыуарлыҡты үҫтереү” программаһында ҡатнашып, дәүләттән бүленгән аҡса­лата ярҙамды ит эшкәртеү цехы асыуға һәм ярымфабрикаттар әҙер­ләүгә, шулай уҡ үтә кәрәкле ҡорамал­дар һатып алыуға йүнәлтә.

Хеҙмәткәрҙәр өсөн бөтә уңайлы шарттар булдырылған: ашатыу ойош­то­ролған, ял һәм душ бүлмәләре бар.

2014 йылда тырыш хеҙмәте өсөн Илгиз Зиннәтуллин район Мәғлүмәт-консультация үҙәгенең маҡтау грамотаһы менән бүләкләнгән. 2016 йылда “Йыл эшҡыуары-2016” республика конкурсының “Төбәк-ара һөҙөм­тәле хеҙмәттәшлек өсөн” номинация­һында еңә, 2017 йылда Башҡортостан Ауыл хужалығы министрлығының Маҡтау грамотаһына лайыҡ була.

Киләсәктә булдыҡлы, егәрле һәм бөтмөр фермер продукция етеште­реүҙе киңәйтергә, мал һуйыу урыны төҙөргә ниәтләй.

Мәсетле районы.