Йәшәйеште йәмлерәк итһен!

Дыуан ауылы халҡы яңы мәҙәниәт йорто тураһында күптән хыяллана, сөн­ки элеккеһе 2010 йылда уҡ авария хә­лендә тип табылған. Быға тиклем мә­ҙәни саралар элекке ауыл хужалығы техникумында, яңы колледждың танта­налар залында үткәрелеп килгән. Әлбиттә, өйҙәш булып йәшәү бер ҙә рәхәт түгел.

Төҙөлөп ятҡан үҙәктә 300 урынлыҡ тамаша залы, ололар һәм балалар өсөн китапхана, тренажер залы була­саҡ. Шулай уҡ ауыл хакимиәте лә ошонда урынлашасаҡ.

Төҙөлөштө “Капитал-строй” йәмғиәте башҡара. Беҙ барғанда, ҡыйыҡты ябалар ине. Йылылыҡ, электр, ка­на­лизация селтәре тулыһынса әҙер, эш­селәрҙең бер өлөшө бинаны эске яҡ­тан биҙәү-штукатурлау менән мәшғүл.

Прораб Петр Лещенский – тәжрибәле хәрби төҙөүсе, илдең төрлө төбәктә­рендә мөһим объекттарҙы сафҡа индереүҙә ҡатнашҡан.

– Төҙөлөш материалдары менән тәь­мин итеүҙә өҙөклөк юҡ. Эш хаҡын ваҡы­тында алабыҙ. Хеҙмәт һөймәгәндәрҙе, илке-һалҡы йөрөгәндәрҙе бөтөнләй тотмайбыҙ, ундайҙар менән шунда уҡ хушлашабыҙ, – ти тәртип һәм теүәллек ҡанына һеңгән хәрби төҙөүсе.

Төҙөлөш эштәренең дөйөм күләме 73 миллион һум, төрлө ҡорамалдар менән 90 миллион һумға етәсәк, тип билдәләнә. “Әгәр барыһы ла ыңғай барһа, эштәрҙе сентябргә тамамларға иҫәп тотабыҙ”, – тине Петр Васильевич.

Яңы мәҙәниәт йорто Дыуан ауылы халҡына оҙон-оҙаҡ йылдар хеҙмәт итһен, ул балаларҙы һәм ололарҙы үҙенә тартып торған, кешеләрҙең йәшәйешен йәмлерәк иткән үҙәккә әйләнһен!