Бөтә яңылыҡтар
Сәләмәт булайыҡ
5 Апрель 2019, 18:30

Сир өсөн сик юҡ

“Роспотребнадзор” хәбәр итеүенсә, ҡыҙылса Европа буйлап киң тарала, Рәсәйҙә лә сир менән бәйле хәл көсөргәнешле. Европаның 38 илендә ауырыуҙар теркәлгән, ә Франция, Италия, Германия һәм Испанияла инфекция сығанаҡтары тағы ла ҙурыраҡ. Беҙҙең илдә ул байтаҡ төбәктәрҙә теркәлгән, шул иҫәптән Башҡортостанда.

“Роспотребнадзор” хәбәр итеүенсә, ҡыҙылса Европа буйлап киң тарала, Рәсәйҙә лә сир менән бәйле хәл көсөргәнешле. Европаның 38 илендә ауырыуҙар теркәлгән, ә Франция, Италия, Германия һәм Испанияла инфекция сығанаҡтары тағы ла ҙурыраҡ. Беҙҙең илдә ул байтаҡ төбәктәрҙә теркәлгән, шул иҫәптән Башҡортостанда.
Былтыр республикала 35 сир осрағы асыҡланды, 14-е ун ете йәш­кә тиклемге балалар ара­һында. Быйыл өс ай эсендә дүрт кеше сирҙе эләктергән, икәүһе баш­ҡа төбәктәрҙән килеүселәр һәм береһе мигранттар ара­һында. Ҡыҙылса буйынса эпидемиологик хәлдең ҡатмарла­ны­уы­ның төп сәбәбе – халыҡ йоғошло сиргә ҡаршы яҡлан­маған. Ә һаҡ­ла­ныуҙың төп ысулы – ҡыҙыл­саға ҡаршы вакцина яһатыу.
Иҫкәртеү прививкаһын медицина ойошмаһында яһатырға мөмкин, участка терапевына мөрәжәғәт итергә кәрәк.
Ҡыҙылса – иҫ киткес тиҙ таралыусы, йоғошло киҫкен вируслы сир. Сығанағы – ауырыу ке­ше. Һауа-тын алыу юлдары аша йоға. Быуаттар дауамында ул ауыр балалар сире тип һа­налды, бик күп ғүмерҙәрҙе ҡыйҙы.
Вакцина яһатыу осорона тиклем йыл һайын донъяла 135-140 миллион кеше сиргә юлы­ғып, 5-7 миллион бала вафат булды. Халыҡты иммунизациялау һөҙөмтәһендә генә республикала сир осраҡтары кәметел­де. 1967 йылда 38 мең сир осра­ғы теркәлһә, 2017 йылда – бер осраҡ.
Сирҙең тәүге билдәләрен ҡарап үтәйек. Ул вируслы инфекция рәүешендә башлана, аҙағыраҡ, өс-биш көн үткәс, тәнгә сабыртмалар сыға. Ә еңел формаһында уларҙың күренмәүе лә ихтимал. Ауырыу йүткерә, сөскөрә, тән температураһы күтәрелә, баш ауырта, хәлһеҙлек һиҙелә. Сабыртма тәүҙә аҡһыл тап рәүешендә ауыҙҙың лайлалы ҡатламында сыға, аҙаҡ тән буйынса ҡыҙыл таптар тарала.
Инфекция ни өсөн хәүефле? Иммунитетты ҡаҡшатыу менән бер­гә, отит, ларингит, менингоэн­це­фалит, пневмония һәм аш­ҡа­ҙан-эсәк сирҙәренә килтереүе һәм хатта һуҡырайыуға юлыҡ­ты­рыуы ихтимал. Былтыр Рәсәй­ҙә сирҙән үлем осрағы теркәл­мәгән.
Милли календарға ярашлы, ҡыҙылсанан прививка бер йәш­тә, аҙаҡ алты йәштә ревакцинация яһала. Кешенең 35 йәш­кә тик­лем тағы ла бер тапҡыр тү­ләү­һеҙ прививка яһатырға хоҡу­ғы бар, тип хәбәр итә “Роспотребнадзор” белгестәре.