Өҫтәлегеҙ кәбеҫтәнән өҙөлмәһен

Оҙайлы ҡыш тамамланыуға ла күп ҡалманы. Был осорҙа иммунитетты нығытыу өсөн С витамины күп тупланған тоҙло кәбеҫтәнән дә файҙалыраҡ аҙыҡ юҡтыр. Хужабикәләр уны нисек кенә тоҙламай, нимә генә ҡушып әҙерләмәй... Һәр кемдең үҙ рецебы һәм сере.

Бактериялар йәшелсәләге шәкәрҙе һөт кислотаһына әүерелдерә. Диабет менән сирләгәндәр өсөн был бик файҙалы, һөт кислотаһы глюкоза кимәлен контролләргә ярҙам итә, эсәклектәге зарарлы микроорганизмдарҙың үрсеүен баҫа, аҙыҡ матдәләр үҙләште­реүҙе тиҙләтә. Тоҙланған кә­беҫтә ҡан тамырҙары өсөн дә файҙалы, “зарарлы” холестерин кимәлен кәметергә ярҙам итә, тимәк, йөрәк ауырыу­ҙарынан һаҡлай тигән һүҙ. Был аҙыҡ өҫтәлегеҙҙән өҙөлмәһен, сөнки ул А витаминына, кальций, марганец һәм калийға бай. Ундағы органик кислоталар күҙәнәктәрҙе тарҡатыусы ирекле радикалдар тәьҫирен кәме­тә. Иң мөһиме, ҡышҡы-яҙғы осорҙа С витаминына бай кәбеҫтә иммунитетты нығыта.

Шуныһын да иҫтә тотоғоҙ, уны ҡулланыуҙа сикләүҙәр ҙә бар. Аҙыҡта бактериялар һәм күҙәнәкле туҡымаларҙың күп булыуы газ барлыҡҡа килте­реүе һәм аҙыҡ эшкәртеү ағза­ларының лайлалы тиресәһен ярһытыуы мөмкин. Гастрит, ашҡаҙан шеше сирҙәренә дусар булған кешеләргә тоҙланған кәбеҫтә менән мауығырға ярамай.

Динә АРЫҪЛАНОВА әҙерләне.