Бөтә яңылыҡтар
Сәләмәт булайыҡ
22 Апрель , 09:06

Һынауҙар беҙҙе һындырмаһын

БР Һаулыҡ һаҡлау министрлығы.
Фото:БР Һаулыҡ һаҡлау министрлығы.

Һуңғы ике-өс йылда һаулыҡ һаҡлау тармағы иңенә төшкән һынауҙарҙы еңеү анһат бирелмәне. Пандемия менән көрәш байтаҡ сығым, кеше ресурстары талап итте. Әле лә был тәңгәлдә бурыстар етерлек, коронавирус менән көрәш һаман дауам итә. Шундай ҡатмарлы шарттарҙа ла республикала һаулыҡ һаҡлау тармағын үҫтереү, һанлаштырыу, яңы төҙөлөштәргә тотоноу, финанс ресурстарын тәғәйен файҙаланыу буйынса планлы эштәр башҡарылғанын күрәбеҙ. Айырыуса һаулыҡ һаҡлау тәүге звеноһын яңыртыу, ауыл-ҡасаба халҡын сифатлы ярҙам менән тәьмин итеү буйынса эштәр һиҙелерлек йәнләнде.

Медицина фәндәре докторы, Рәсәйҙең атҡаҙанған фән эшмә­кәре, билдәле хирург, профессор Вил Тимербулатовҡа һуңғы осорҙа тармаҡтағы үҙгәреш­тәрҙе нисек баһалағанын һорап мөрәжәғәт иттек. Уны республикала бығаса булмағанса күләмдә һәм тиҙлектә һаулыҡ һаҡлау объекттарының төҙө­лөүе һөйөндөрә.

– Беҙҙә бер ваҡытта ла дауалау учреждениелары бындай ҡыҫҡа ваҡытта төҙөлмәне. Зубов­тағы йоғошло ауырыуҙар госпитале ни бары 53 көн эсендә барлыҡҡа килде. Стәрлета­маҡтағы ковид госпитале лә шулай уҡ ҡыҫҡа ваҡыт эсендә сафҡа инде. Әле Сибай һәм Туймазыла күп функциялы госпиталдәр эш башланы. Иң мөһиме, уларҙа бөтә шарттар – реанимация койкалары, үпкәне яһалма елләтеү аппараттары, компьютер томографтары, ультратауыш, рентген ҡорамалдары буласаҡ. Халыҡтың медицина ярҙамы менән тулыһынса тәьмин ителеренә ышанам, – ти доктор.

Эксперт фекеренсә, пандемия тамамланыу менән дауаханалар буш тормаясаҡ, терапия дауаханаһы булып үҙгәр­телеүҙәре мөмкин. Госпиталдең ҡурай тажы рәүешендә һалы­ныуы ҙур уңайлыҡ тыуҙыра, һәр корпусты айырым файҙала­нырға була. Профессор аң­латыуынса, Стәрлетамаҡтағы ковид госпитале өҫтәмә рә­үештә хирургия койкалары, бала табыу, балалар бүлек­сәһе, операция блогы менән тулылан­дырылған, тимәк, ауырыуҙы бер ҡайҙа ла күсереп йөрөтөү талап ителмәй. Реанимация койкала­рының халыҡ-ара стандарттарға яуап би­реүен дә табип юғары баһаланы.

“Өфөлә хәҙерге ваҡытта үҙенсәлекле үҙәк – кардиохирургия комплексы төҙөлөшө тамамлана. Учалыла оҙаҡламай хирургия корпусы сафҡа инергә тора, Туймазы һәм Дүртөйлөлә балалар поликлиникалары төҙөлдө. Капиталь ремонт башҡарылған учреждениелар күпме – һанап тормайым. Был эштәрҙең барыһы ла пандемия осоронда сикләнгән мөмкин­лектәр мәлендә башҡарылды, республика етәкселеге тармаҡ­ҡа ҙур иғтибар бирҙе. Башҡорт дәүләт медицина универси­тетының ҡыҫҡа ғына осорҙа бөтә йүнәлештәр буйынса белгестәр әҙерләй алғанын да билдәләргә кәрәк”, – тип тармаҡтағы аҙымдарҙы юғары баһаланы ғалим.

Ошондай яуаплы осорҙа медицина хеҙмәткәрҙәренең ауыр, тынғыһыҙ хеҙмәтен лайыҡлы баһалау, наградалар тапшырыу уйланылған, дөрөҫ аҙымдарҙың береһе булды. Улар, һис шик­һеҙ, бөгөнгө заман геройҙары, хөрмәткә лайыҡ хеҙмәткәрҙәр.

Һуңғы йылдарҙа Башҡорт­остандың һаулыҡ һаҡлау тармағындағы тәжрибәһенең төбәктәргә таратылғанына ша­һит­быҙ. Бының менән ғорур­ланабыҙ. Яңыраҡ Рәсәй Һаулыҡ һаҡлау министрлығы “Һаулыҡ һаҡлау” милли проекты буйынса ил төбәктәре менән кәңәшмә үткәргәндә Башҡорт­остандың Һаулыҡ һаҡлау министрлығы эшмәкәрлегенә лә иғтибар итте һәм уның эш тәжрибәһен башҡа төбәктәрҙә уртаҡлашҡанын һыҙыҡ өҫтөнә алды.

Рәсәй төбәктәрендә һаулыҡ һаҡлауҙың тәүге звеноһын яңыртыу программаһы 2021 йылдың 1 ғинуарынан башланды. Уға ярашлы, өҫтәмә медицина объекттарын файҙала­ныуға тапшырыу, яңы ҡора­малдар менән йыһазландырыу, транспорт саралары менән тәьмин итеү ҡарала. Ошо программа буйынса Башҡорт­останда былтыр 73 модулле фельдшер-акушерлыҡ пункты урынлаштырылды, райондарҙа һигеҙ капиталь ФАП төҙөлдө. Шулай уҡ 22 медицина ойошмаһында капиталь ремонт эштәре башҡарылды. Үткән йылда медицина ойошмалары өсөн 76 автомобиль транспорты алынды.

2022 йыл тармаҡ алдына тағы ла мөһимерәк, ҡатмар­лыраҡ бурыстар ҡуя. Маҡсат бер – сифатлы һәм һәр кем фай­ҙаланырлыҡ медицина яр­ҙамы күрһәтеү. Әйткәндәй, быйыл республикала 58 яңы медицина учреждениеһын сафҡа индереү планлаштырыла.

Еренә еткерелер, атҡа­рылыр бурыстарҙың һәм хәл итер мәсьәләләрҙең, ха­лыҡты бор­соған етешһеҙ­лек­тәрҙең әлегә байтаҡ булғанын аңлайбыҙ. Әммә тармаҡтың тарихта бул­мағанса күтәрелеш кисереүе, яңыртылыуы алдағы аҙым­дарҙың тағы ла баҙы­ғыраҡ, өмөтлөрәк булырына ышаныс тыуҙыра. Һынауҙар беҙҙе һындырмаҫ, тип уй­лайбыҙ.

Динә АРЫҪЛАНОВА 

Читайте нас в