Төндә организм ниҙәр кисерә?

Һәр сәғәттә – айырым процесс. Мәҫәлән, киске 10-да биологик сәғәттәр ятырға кәрәклекте иҫкәртһә, төнгө 3-4 тирәһендә иһә кеше тәрән йоҡоға тала.

Көн буйы хәлле-дәртле булыу өсөн үҙ ваҡытында ятып, яҡшы ял итергә, көс тупларға кәрәк икәнлеген беләбеҙ. Юҡһа, баш ауыртыуы, эштең һөҙөмтәлелеге насар булыуы бар. Һәр сәғәт организмда барған ниндәйҙер бер про­цесҡа яуап бирә, тип билдә­ләгән тикшеренеүселәр.

Мәҫәлән...

22.00 сәғәттә ҡанда лейкоцит күләме икеләтә арта. Тән температураһы төшә. Биологик сәғәт йоҡларға кәрәклекте иҫкәртә.

23.00 сәғәттә тән нығыраҡ йомшара, шул уҡ ваҡытта һәр күҙәнәктең тергеҙелеү сис­темаһы бара.

24.00 сәғәт. Йоҡо нығыраҡ баҫа, төш күрә башлау мәле етә, ә мейе эшләүен дауам итә: көн дауамында алған мәғлүмәтте тәртипкә килтерә.

Сәғәт 1-ҙә йоҡо бик һиҙгер. Электән ауыртҡан берәй ағза үҙен һиҙҙертеүе һәм таңға тиклем һыҙландырыуы ихтимал.

Сәғәт 02.00. Бөтә ағзалар ҙа ял иткәндә, бауыр эшләй: ойоған организмды шлак­тарҙан таҙартыу эшен туҡ­татмай.

Сәғәт 03.00. Кеше тулы­һын­са йоҡоға тала: ҡан баҫымы төшә, пульстың тибеше һәм тын алыш һирәк-һаяҡ ҡына тойола.

Сәғәт 04.00. Мейегә ҡан аҙ барғанлыҡтан, кеше уянырға әҙер түгел әле. Ә бына ишетеү һәләте был ваҡытта көслө: шым ғына тауыштан да уяны­уың бар.

Сәғәт 05.00. Бөйөрҙәр ял итә, мускул хәлһеҙ, матдәләр алмашыныуы әкрен генә бара, шул уҡ ваҡытта организм уянырға әҙер.

Сәғәт 06.00. Бөйөр өҫтө биҙҙәре ҡанға адреналин һәм норадреналин ебәрә башлай. Улар үҙ сиратында ҡан баҫы­мын күтәрә һәм йөрәк тибешен шәбәйтә. Тимәк, организм да уянырға әҙер, ә аң һаман йоҡомһорай әле.

Сәғәт 7-лә – иммун сис­темаһының йондоҙло сәғәте. Был ваҡытта организм уяныр­ға тулыһынса әҙер. Тороп, кирелеп-һуҙылып, һыуыҡ һәм эҫе һыуҙы алмаш-тилмәш һиптереп йыуыныу мәле етә. Был ваҡытта эскән дарыу ҙа яҡшы үҙләштерелә, ти табиптар.

- Әҡлимә ҒИЗЗӘТУЛЛИНА