Республикала муниципалитет башлыҡтарына йәшерен мәғлүмәттәрҙе урларға маташыу осраҡтары тураһында Федераль именлек хеҙмәтенә хәбәр итеү бурысын йөкмәттеләр. Дәүләт Йыйылышы – Ҡоролтайҙан белдереүҙәренсә, урындағы хакимиәт етәкселәренең дәүләт серен мотлаҡ белеү хоҡуғын нығытҡан закон ғәмәлгә инде.
– Хәҙер дәүләт серен белеү хакимиәт башлыҡтары менән төҙөлгән контракттың типовой формаһына индерелгән. Ул дәүләт сере тураһындағы федераль ҡануниәт талаптарын үтәүҙе күҙ уңында тота. Мәҫәлән, сит-ят кешеләрҙең йәшерен мәғлүмәтте алырға маташыуы тураһында Федераль именлек хеҙмәте органдарына хәбәр итеү бурысы, биш йылға тиклем илдән ситкә сығыуҙы ваҡытлыса сикләү мөмкинлеге хаҡында һүҙ бара, – тине парламент спикеры Константин Толкачев.
Ошо уҡ закон менән ҡала мэрҙары һәм район хакимиәт башлыҡтары өсөн нормалаштырылмаған эш көнө билдәләнә.
Фото voicesevas.ru сайтынан алынды.