Бөтә яңылыҡтар
Сәйәсәт һәм хоҡуҡ
12 Июль 2019, 13:13

Юрист кәңәштәре (12.07.2019)

Халыҡтан килгән төрлө һорауҙарға яуаптар.

Һәр кемгә өлөш бүлергә онотмағыҙ



“Бәлиғ булмаған ҡыҙым һәм улым менән бер бүлмәле фатирҙа йәшәй­беҙ. Күсемһеҙ милек – атай-әсәйем исемендә. Ошо фатирҙы һатып, әсә­лек капиталын файҙаланып, ҙу­рыраҡ, иркенерәк йорт алырға ине. Әммә был осраҡта әсәлек капиталын файҙаланырға яраймы? Өҫтә­үенә йортто балаларыма рәсми­ләштереү тигән хыялым тормошҡа ашырмы? Ә балаларымдың атаһы менән күптән айырылышҡанбыҙ. Ул беҙҙән айырым йәшәй.


Зөлфиә.

Салауат ҡалаһы”.


– Законға ярашлы, әсәлек капиталы торлаҡ шарттарын яҡшыртыу өсөн бирелә. Был аҡсаға күсемһеҙ милек алғас, унда һәр кемдең, шул иҫәптән балаларҙың да өлөшөн бүлеп бирергә онотмағыҙ. Яңы өйҙө ҡыҙығыҙ менән улығыҙға яҙҙыра алаһығыҙ.


Барыһына ла түгел



“Өфөлә торлаҡ мәсьәләһе менән ниндәй адвокатҡа бушлай барырға мөмкин? Улар түләүһеҙ ярҙам итер­гә тейеш тип ишеттем.

З. СИБӘҒӘТОВ”.

– Кем һеҙгә был хаҡта әйтте икән? Бөтөнләй дөрөҫ түгел. Енәйәт эше буйынса ғәйепләнгәндәргә генә бушлай адвокат ярҙамы күрһәтелә.


Уйлап ҡул ҡуй


“Шәхси эшҡыуар магазинында аҙыҡ-түлек менән сауҙа итәм. Ярты йылдан ашыу ревизияның булғаны юҡ ине. Әммә күптән түгел ҙур ғына күләмдәге аҡсаның етешмәүе асыҡ­ланды. Бер үҙем генә эшләйем. Шу­ға был хәлдең килеп сығыуын бер нисек тә аңламайым. Былай ҙа ғаи­лә сәбәптәре буйынса эштән китергә уйлай инем. Хәҙер ошо юҡҡа сыҡҡан сумманы ҡапларға тейешменме?

Зилдә.
Иглин районы”.


– Әгәр матди яуаплылыҡ тураһын­дағы килешеүгә ҡул ҡуйһағыҙ, был зыянды ҡапларға тейешһегеҙ, шуға нин­дәйҙер документҡа имза ҡуйыр алдынан уны ныҡлап уҡып сығырға кәрәк.


Ваҡытында өлгөрөгөҙ



“Күптән түгел салонда еңел машина һатып алдыҡ, әммә уның сифатлы булмауы асыҡланды. Автомобилде алмаштыра алабыҙмы?

Р. МӨЬМИНОВ.
Ҡырмыҫҡалы районы”.


– Ҡулланыусылар хоҡуҡтарын яҡлау тураһындағы законға ярашлы, машинаны ҡулға алған (һатылған түгел!) ва­ҡыт­тан һуң ун дүрт көн эсендә алмаш­тырырға йә аҡсаны кире ҡайтарырға мөмкин. Әгәр был ваҡыт үткән икән, машинаның етешһеҙлектәре гарантия ваҡытында бөтөрөлөргә тейеш.