Халыҡ һайлауҙа ҡатнашһын өсөн шарттар тыуҙырылған

Һайлау көнөндә булған урында тауыш биреүселәр кемдәр?

“Мобиль һайлаусы” система­һы менән 2019 йылдың 8 сен­тябрендә теркәү урынында була алмаған, әммә Башҡорт­остан Республикаһы биләмә­һенән ситкә сыҡмаған граждандар ҡуллана ала. Улар – командировкала булғандар, башҡа ҡалала уҡығандар, дауаханала ятҡандар, ял итергә киткәндәр, теркәү урыны буйынса йәшәмә­гәндәр, башҡа һайлау участка­һында тауыш бирергә теләгән­дәр.

Мәҫәлән, физик мөмкинлеге сикләнгән граждандар үҙҙәре өсөн махсус йыһазландырылған урындарҙа тауыш бирә ала. Был осраҡта инеү, йәйәүлеләр өсөн йөрөү, шәхси автотранс­портыңды ҡуйыу урындары, тауыш биреү сараһының беренсе ҡатта ойошторолоуы, киң ишекле лифттарҙың, пандустарҙың, махсус япмаларҙың, тактиль күрһәткестәрҙең, яҡтылыҡтың етерлек кимәлдә булыуы иҫәпкә алыныуы ихтимал.

“Мобиль һайлаусы” алымының мөмкинлектәре

Берҙәм тауыш биреү көнөндә һайлаусы үҙе булған урында түбәндәге шарттарҙа тауыш бирә ала:

* Башҡортостан Респуб­ликаһы Башлығын һайлауҙа – Башҡортостан Республикаһы биләмәһендәге үҙегеҙ теләгән һайлау округында;

* Бер мандатлы һайлау округтары буйынса Башҡорт­остан Республикаһы Дәүләт Йыйылышы – Ҡоролтай депутатта­рын өҫтәмә һайлауҙарҙа – үҙең­дең һайлау округы биләмәһен­дәге ниндәй ҙә булһа һайлау участкаһында.

Башҡортостан Республикаһы Дәүләт Йыйылышы – Ҡоролтай депутаттарын өҫтәмә һайлау 9-сы Октябрь (Өфө ҡалаһы ҡала округының Октябрь районы) һәм 16-сы Комсомол (Нефтекама ҡалаһы ҡала округы) бер мандатлы һайлау округтарында үтә.

Ғаризаны ҡайҙа һәм ҡасан бирергә мөмкин?

Ғаризаны 24 июлдән 4 сен­тябргә тиклем һайлау көнөн­дә буласаҡ урындағы исем­лек­кә индереүҙе һорап яҙа алаһығыҙ:

* Башҡортостан Республи­каһы биләмәһендәге 69 территориаль һайлау комиссияла­рының бере­һендә;

* Дәүләт һәм муниципаль хеҙ­мәттәр күрһәтеүсе Күп функциялы үҙәктәрҙең 97 филиа­лы­ның һәм бүлексәһенең бере­һендә;

* Дәүләт һәм муниципаль хеҙмәттәрҙең берҙәм порталында – иҫәп яҙмаһы булған осраҡ­та, “Дәүләт хеҙмәттәре” порталында.

Ә 28 августан 4 сентябргә тик­лем республиканың 3397 участка һайлау комиссияһының береһендә ғариза ҡалдырырға мөмкин.

Һәр кем паспорты менән үрҙә әйтеп үтелгән ғариза ҡабул итеү пунктының береһенә мөрәжәғәт итеп, 8 сентябрҙә тауыш бирә­сәк һайлау участкаһын билдә­ләргә тейеш. Үҙегеҙгә кәрәкле участканың адресын Рәсәй Үҙәк һайлау комиссияһы сайтына (www.cikrf.ru) инеп, “Рәсәй кар­таһында территориаль һайлау комиссиялары һәм участка һайлау комиссиялары” һайлау инфраструктураһы объекттары интерактив картаһы ярҙамында табырға мөмкин. Республика Үҙәк һайлау комиссияһы сайтында “Үҙеңдең һайлау участ­каңды тап” сервисы булды­рылған, ул һайлау участкаһын йәшәгән урындың адресы йәки участканың һаны буйынса табырға булышлыҡ итә.

Был сайттарға мөрәжәғәт итеү мөмкинлегегеҙ булмаһа, һайлау участкаһын асыҡлау йәһәтенән ғариза ҡабул итеү пункты операторы ярҙам итәсәк. Ғариза биргәндән һуң һайлау­сыны йәшәгән урыны буйынса һайлаусылар исемлегенән тө­шө­рөп, 8 сентябрҙә буласаҡ урыны буйынса исемлеккә ин­дерәсәктәр. Ғаризала граждан­дың паспорт мәғлүмәттәре күрһәтелә. Пункт операторы барлыҡ мәғлүмәтте тикшер­гәндән һуң ғаризаны теркәй, уның төп өлөшөн ҡабул итеү пунктында ҡалдыра, ә йыртма талонды һайлаусыға тапшыра. Был талонда һайлаусы Берҙәм һайлау көнөндә тауыш бирәсәк участканың һаны, адресы күрһәтелгән була. Ғариза бер генә тапҡыр яҙыла. Әгәр граждан бер нисә ғариза яҙһа, уның иң тәүгеһе генә ғәмәлдә була­саҡ, башҡалары иҫәпкә алын­маясаҡ.

Ғариза биреп тә, командировка кисектерелһә...

Яңы урынға барып етмә­гәнһең, ә үҙ участкаңдан һине “һыҙып” өлгөргәндәр... Бындай осраҡта һайлау көнөндә һәр кем үҙ участкаһына килә ала. Әммә тауыш биреү бер аҙ ҡатмарлашасаҡ: бының өсөн тейешле тикшереү үтергә кәрәк буласаҡ. Һайлаусының алдан планлаштырған, йәғни ғаризала күрһәтелгән участкала тауыш бирмәүе раҫланған осраҡта ғына уға үҙ биләмәһендә гражданлыҡ бурысын үтәргә рөхсәт итәсәктәр. Участка һай­лау комиссияһы быны һайлау­сы мөрәжәғәт иткәндән алып ике сәғәт эсендә эшләргә бурыслы.

Гражданды йәшәү урыны буйынса һайлаусылар исемлегенә яңынан индереү өсөн паспорт йәки шәхесте танытыусы башҡа төрлө документ кәрәк буласаҡ.

Ҡапыл командировкаға сыҡҡанда...

Әгәр һайлаусы 24 июлдән 4 сентябргә тиклем территориаль һәм участка һайлау комис­сия­ларының ғариза ҡабул итеү пункттары, Күп функциялы үҙәк йәки Дәүләт хеҙмәттәре порталы аша ғариза биреп өлгөрмәһә, 5 сентябрҙән 7 сен­тябрҙең 14.00 сәғәтенә тиклем теркәү уры­ны буйынса участка һайлау комиссияһына килеп, тауыш биреү көнөндә буласаҡ урындың һайлаусылары исем­легенә ин­дереүҙе һорап, махсус ғариза яҙырға тейеш. Был ғариза һай­лаусының үҙендә була, тауыш биреү көнөндә ул уны граж­данлыҡ бурысын үтәгән һайлау участкаһында ҡалдыра. Төрлө мутлашыуҙарға юл ҡуй­мау өсөн бындай ғариза­лар­ға һаҡлау билдәһе – марка ҡуйылған.

Бер ҡайҙа ла теркәлмәгән һайлаусы ҡайҙа тауыш бирә ала?

Рәсәй Федерацияһы биләмә­һендә йәшәү урыны буйынса теркәүе булмаған граждандар 2019 йылдың 8 сентябрендә үтәсәк Башҡортостан Респуб­ликаһы Башлығын һайлауҙа Өфөлә 119-сы участкала тауыш бирә ала. Адресы: Өфө ҡалаһы, Посадская урамы, 26.