"Мине айырыуса Өфө халҡы ҡыуандырҙы"

"Үткән һайлауҙарға килгәндәр һаны бер аҙ кәм булды, 85-88 процент кимәлендә. Ә әлеге сарала мине айырыуса Өфө халҡы ҡыуандырҙы: уларҙың 87 проценты тауыш биргән, - тине Дәүләт Думаһы депутаты Павел Качкаев. - Хатта Президент һәм республика Башлығы һайлауҙарында күрһәткес 70-75 процент кимәлендә булғайны. Был - киң мәғлүмәт сараларында Конституцияға төҙәтмәләр индереү буйынса тикшереүҙәр күп булыуының һөҙөмтәһе, тип уйлайым. Икенсе сәбәп – граждандарға өйҙә, эш урынында тауыш биреү мөмкинлеге тыуҙырылып, эште урындарға сығып ойоштороу".

Башҡортостан Үҙәк һайлау комиссияһы мәғлүмәттәре буйынса, тауыш биргәндәрҙең 88,68 проценты Конституцияға индерелгән төҙәтмәләрҙе хуплаған, ә 10,6 проценты “юҡ” тип белдергән.

“Илдәге бер нәмәне лә ҡабул итмәгән һәм бөтәһен дә тик ҡара төҫтә генә күргән кешеләр бар, ҡаршы сыҡҡандар сама менән 10-15 процент тәшкил итә. Дөйөм алғанда, республика халҡының төҙәтмәләр кәрәклеген аңлауы менән ҡәнәғәтмен. Сәйәси һәм ғәмәлдәге тормошта үҙгәрештәр бик күп. Һәр илдең төп законы бөгөнгө ысынбарлыҡты сағылдырырға тейеш”, – тине Павел Качкаев.

Фото: “Башинформ”.